Khan orongera Vargas
KUDZOKA kwaAmir Khan munhandare yetsiva kwakaziviswa zvichitevera kuhwina kwaakaita mumutambo wake wekupedzisira uyo waakakunda Phil Lo Greco muna Kubvumbi.
Khan achasangana naSamuel Vargas kuBirmingham musi waGunyana 8 apo ari kushanda kuti adzoke mutsiva arwe nevamwe vane mazita makuru mumutambo uyu.
Vargas — uyo anove chizvarwa chekuCanada — ndewechi10 pasi rose pashasha dzetsiva sezviri mumagwaro eWBA uye uyu achave mutambo mukuru kuna Khan uyo anokwikwidza muboka rewelterweight. Khan akavimbisa mutambo mukuru uyu achiti, “Chinhu chikuru chandainge ndakazvivimbisa gore rino kukwikwidza kakawanda pese pandinokwanisa, saka ndiri kufara kuti ndiri kudzoka munhandare nekuchimbidza kuzosangana naSamuel Vargas,” anodaro.
“Vargas mutambi akasimba ane tarenda uye akarwa nevamwe vatambi vakuru vanosanganisira Danny Garcia naErrol Spence Jr.
“Ndinofanirwa kudarika Vargas ndisati ndatanga kufunga zvemimwe mitambo iri kumberi mikuru. Handisi kuzotarisira Vargas pasi nekuti ndinoziva acharwa nezvese zvaainazvo patiri kusangana.
“Ndinovimba kupa vatsigiri vekuBirmingham mufaro mukuru nemutambo unonakidza semutambo wangu wekupedzisira. Hausi wekuruza.”
Asi Vargas akavimbisa kurakasha Khan pavari kusangana mumutambo uyu achiti, “Inzwai mashoko angu, tingave tichibva munzvimbo imwe chete nenyika imwe chete asi handina kufanana naPhil Lo Greco icho ndicho chokwadi, Amir achazvionera hake.” — SportsMail boxing