Beachd Ailein
Tha cuimhne agam mar a bhiodh daoine ag ràdh gun robh a’ bhliadhna “a’ fàs sean mar-thà” ma bha iad a’ coinneachadh airson a’ chiad turus mun ìre seo de bhliadhna ùr! Còrr air seachdain a-staigh dhan bhliadhna agus beatha làitheil a’ mhòr-chuid air ais chun an àbhaist is daoine air ais ag obair ach ‘s dòcha le beagan amas air adhartas neo leasachadh air choreigin nan suidheachadh pearsanta. Chuala mi Neachgairm Chomhairle nan Eilean Siar ag ràdh gur e fear de na h-adhartasan a dh’iarradh e fhèin ann an 2020 gun d’ rachadh an càball dealain eadar na h-Eileanan Siar agus tìr-mòr a leagail gus gum biodh dòigh aig dealan bho thuathan-gaoithe nan eilean a bhiathadh dhan ghriod nàiseanta. ‘S fhada bho thòisich an iomairt airson a’ cheangail seo agus cha b’ iongnadh ged a bhiodh eileanaich a’ fàs gu math leamh leis gach cnap-starra a th’ air tighinn nan rathad, ach mo bheannachd orra airson cumail a’ strì agus bu mhath gu dearbh gum bu seo a’ bhliadhna a bhuannaicheas iad.
Mar a bhiodh dùil fhuair obair Bòrd-leasachaidh na
Gàidhealtachd ’s nan Eilean agus Iomairt na Gàidhealtachd ’s nan Eilean moladh agus càineadh thar nam bliadhnaichean agus tha mòran fhathast a tha den aon bheachd ‘s a bha a’ chiad Chathraiche air a’ Bhòrd-leasachaidh, Sir Raibeart Grieve, nuair a thuirt esan còrr air leth-cheud bliadhna air ais gur ann air an ìre gun d’ rachadh aige air sluagh a ghleidheadh anns na sgìrean croitearachd a rachadh èifeachdas a’ Bhùird a mheasadh. Thar nam bliadhnaichean tha gach buidheann air aithris air na chaidh de chosnaidhean a chruthachadh agus a ghleidheadh, ach ged a chaidh gnìomhachasan a stèidheachadh a mhair chan eil tionnsgalan air nochdadh anns na h-Eileanan neo air an iomall a leigeas le sgìrean fàs gun a bhith an eisimeil taic phoblaich. ’S fhada bho thòisich mi fhìn air argamaid gur e gnìomhachas cumhachd na gaoithe ’s na mara sàr chothrom air leithid seo de chosnadh air na h-iomaill, agus gum faodadh e an t-amas aig Grieve a choileanadh cuideachd! Nan robh càball a’ ruith bho thuath gu deas tron Chuan Sgìth gu ruige Hunterston saoil nach fhosgladh sin cothroman cosnaidh agus misneachd dha iomadh coimhearsnachd air an iomall. Gun teagamh bhiodh leithid de cheangal daor a stèidheachadh ach nan cruthaicheadh e cosnaidhean a ghleidheadh sluagh ann an coimhearsnachdan bhiodh e a’ freagairt dùbhlan leasachaidh eaconamach an iomaill na b’ èifeachdaiche na dad a thachair thuige seo.
Tha mi’ n dòchas gum faigh na h-Eileanan Siar na ceanglaichean a leigeas leis an sgìre fàs agus soirbheachadh, agus gun tig cothroman den aon seòrsa dha sgìrean eile air na h-iomaill.
Comhairle nan Eilean Siar hopes that 2020 will bring a succesful conclusion to its long-running campaign for a sub-sea cable to enable green energy to be exported from the Western Isles to the national grid. The potential economic benefit to the community makes a seriously strong case!