La Voz de Galicia (Ferrol) - La Voz de Galicia (Ferrol) - Especial1
A infantería romana toma Lucus
A asociación de recreación histórica Cohors III Lucensium quizais é a máis coñecida das festas do Arde Lucus por varios motivos, desde a súa traxectoria (nace no 2007), pasando polo seu espectacular campamento na Praza Maior, ou pola promoción nacional e internacional que fixeron da festa lucense.
A asociación nace tendo como referencia o Arde Lucus e dende un profundo compromiso cultural, o seu obxectivo principal é a difusión da cultura romana en todos os seus ámbitos, aportando unha participación moi activa tanto neste evento coma noutros, que ó longo da nosa xeografía e incluso en outros países, exaltan a cultura romana a través da reconstrución histórica. Esta asociación toma o nome dunha unidade auxiliar do exército romano, que formaba parte da Lexio VII Gemina, do tipo Cohors quinquagenaria peditata, formado por infantería pesada recrutada orixinariamente entre os habitantes do Conventus Iuridicus Lucensium do que Lucus Augusti era capital.
Os principais retos cos que se atopou a asociación para facer una boa reconstrución histórica son, por una parte, a fabricación e réplica de materiais, coa máxima fidelidade e rigor histórico posible, baseándose en restos arqueolóxicos, iconográficos, en citas ou descricións literarias e por outra parte, na representación de escenas realistas tanto da vida militar como civil. Nesta liña, intenta reproducir exactamente as ferramentas, oficios, vestimentas, armas, xoias, cerimonias ou situacións da vida diaria có maior detalle e fidelidade, con fins educativos, divulgativos e experimentais.
A Cohors III Lucensium conta hoxe en día con unha gran cantidade de material que se podería agrupar en tres grandes apartados. Por unha parte toda a vestimenta e equipo persoal dos asociados que compoñen a unidade militar, coññécese como Impedimenta e constitúe un dos puntos máis vistosos pola súa similitude e calidade de reprodución cos orixinais que empregaban as lexións romanas. Contan co vestiario que levaban os distintos tipos de lexionarios como Hastati, Velites, Triari, Princeps, Lictor, cabalería, arqueiros…
En segundo lugar o campamento romano, construción de 300 metros cadrados que se pode percorrer no seu perímetro superior e que alberga o museo, onde amosa en urnas reproducións que representan a evolución do aparato militar romano, destacando a colección de cascos e de espadas, ademais de material da vida civil e cotiá como peites, xoias, xogos de mesa, ánforas, lucernas, material de escritura, instrumental médico, máscaras, ungüentarios... Neste apartado merece atención especial a sección de topografía, cunha colección de maquinaria utilizada polos topógrafos e agrimensores romanos con instrumentos coma a groma, libella, corobates, dioptra...
En terceiro lugar, destaca a sección de artillería, denominada poliorcética romana coa torre de asedio, o onagro, o escorpión, a ballita e o ariete, que constitúen a base sobre a que se asentaba toda a maquinaria de asedio no mundo romano, e as reproducións desenvolvidas pola Cohors III sitúanse na cuspide a nivel mundial no que a recreación histórica se refire.
Ademais, a asociación, na súa labor de divulgación histórica, ó longo dos anos foi creando unha serie de exposicións monográficas. Neste apartado cabe destacar a exposición Panem romanorum na que se da a coñecer a importancia que tiveron as panaderías na antiga Roma, mostrando varios espazos expositivos perfectamente documentados, que mostran información detallada de todos os elementos e mostrando todo o proceso do pan, dende a recollida do cereal ata a venda das pezas, sistemas de pesado e de medida, obradoiros, tipos de muíños, fornos... Tamén destaca a exposición In vino veritas baseada na recreación de unha cella vinaria e asociada a unha tabernae. Integran distintos tipos de prensas de viga (torcularium) para o prensado das uvas e a obtención do mosto, e dolias e ánforas de distintas medidas para a maduración, almacenaxe, e transporte do viño. A Cohors III tamén conta cunha importante colección de maquetas, moi útiles para fixar coñecementos e que o público entenda mellor un tema, sobre todo pensando nos nenos polo que supón un gran atractivo nas visitas dos centros escolares.
Outra das facetas pola que esta asocia- ción e moi coñecida é por acuñar a moeda oficial do Arde Lucus. Dende a súa fundación a Cohors presenta cada ano unha peza, réplica dunha moeda romana, que se pon en circulación durante a celebración do Arde Lucus. Para este ano a elixida e un Follis de bronce do ano 320 d.C. No anverso da moeda aparece Constantino I o Grande, emperador que decretou o fin da persecución ós cristiáns e que no ano 310 d.C. fixo entrega da muralla de Lugo.
Con todo isto, un dos principais atractivos da asociación é o compromiso co que afrontan a recreación do mundo dos lexionarios romanos. Cada socio ten asignado un nome romano dun personaxe real da época, do que coñecen e representan a súa historia, e así cada un no seu papel, escenifican traballos da vida cotiá, amosan o funcionamento da maquinaria que expoñen, no seu Ordine Mutatio representan os adestramentos de distintos movementos e tácticas militares das lexións, e realizan espectaculares desfiles.
Estas representacións non só se poden ver durante o Arde Lucus, senón que a Cohors III Lucensium, ó longo destes anos, tamén participou en moitos eventos en pobos e cidades de Galicia (Coruña, Friol, Viveiro, As Pontes, O Cebreiro... ), en distintas cidades de España (León, Santander, Astorga, Sagunto...) e de Portugal (Chaves, Braga...). En abril deste ano participou no festival internacional Roman Apulum, na cidade de Alba Iulia en Romania, festival referente na recreación histórica no leste de Europa, no que participaron asociacións de Romanía, Italia, Alemaña, Ucraína, República Checa e Bulgaria, sendo a primeira vez que participa unha asociación española.
Con toda seguridade, un ano máis, o traballo e compromiso dos membros desta asociación lograrán que o campamento e as recreacións da Cohors III Lucensium sexan un gran atractivo para este ARDE LUCUS MMXVIII.
Ademais da festa lucense, apostan polo rigor e por dar a coñecer a historia