FOTOGRAFIE-RUBRIEK
Neem jou beste bootsafari-foto’s ooit
Safarimaatskappye en lodges het onlangs hulle bote spesifiek vir natuurlewefotograwe begin toerus. Met swaaistoele en spoggerige rusplekke vir ’n kameralens is die Choberivier skielik een van Suider-Afrika se gewildste safari-bestemmings. Ek was onlangs op twee sulke fotografietoere en het vyf wenke om jou volgende besoek aan Kasane onvergeetlik te maak.
1 WAG VIR DIE WINTER
Die Choberivier is altyd pragtig, met bobbejane wat op die oewer speel en visarende wat baljaar, maar die seisoene speel ’n groot rol in wat jy te sien sal kry. In die somermaande (November tot Mei) is die natuurlike watermere in die binneland vol reënwater, wat beteken dat die hordes olifante en buffels nie by die rivier kom water drink nie. Die “diereverkeer” by die water is dus net ’n breukdeel van wat dit in die droër maande is (Junie tot Oktober).
2 KOES VIR DIE SKARES
Die meeste bote, ongeag of dit vol rooigebrande Duitse toeriste of fotograwe is, vertrek vanaf Kasane, die hartklop van Chobe. Die versoeking is dalk groot om te wag totdat daardie olifanttrop net buite die dorp rivier toe begin stap, maar wees geduldig.
Teen die tyd dat die eerste olifant sy toon in die water sit, sal die fotograwe om hom swerm, wat dit onmoontlik sal maak om goeie foto’s te neem. Vra jou bootbestuurder om die krane oop te draai vir die eerste halfuur.
Waai vriendelik vir almal op die oewer, maar begin eers ankers gooi vir foto’s as jy ’n paar kilometer stroomop is.
Jy sal die rus en vrede waardeer.
3 BLY OP ’N HUISBOOT
Hoewel hotelle soos die Chobe Safari Lodge in Kasane billik en gerieflik is, is die heel lekkerste as jy op die water kan bly. Ek beveel die Pangolin Voyager-huisboot aan (www.pangolinphoto.com/safaris/voyager). Dis wel duurder, maar daarvoor kry jy groter eksklusiwiteit (net 10 gaste), jou eie sjef en ’n goed toegeruste, private fotografieboot. Jy oornag in die middel van nêrens, want die boot ry ’n ent weg van Kasane. Dit beteken die leeus en seekoeie vir jou soggens ’n private vertoning gee.
4 PAK ’N WYEHOEKLENS (OF TWEE) IN JOU KAMERASAK
Omdat die Chobe-rivier ’n voëlkykparadys is, maak baie fotograwe die fout om net ’n zoemlens saam te bring op safari. Ja, jy gaan bly wees oor jou 500 mm of 600 mm-lens as jy ’n byevreter of ’n Afrika-waterploeër sien verbyvlieg, maar vir die groep olifante wat in die water baljaar, gaan jy meer in die raam wil inpas. Pak ’n middelafstandlens in (soos ’n 70 mm-200 mm- of 100 mm400 mm-lens), sowel as ’n wyehoeklens (20 mm of wyer).
5 MIK STROOMAF
Bote wat uit Kasane vertrek, vaar gewoonlik stroomop omdat die meeste groot soogdiere daar versamel. Daar is egter ’n baie spesiale fotografieplek ’n klein entjie stroomaf van Kasane. ’n Paar stroomversnellings naby die Impalila-eiland sorg vir ’n bymekaarkomplek vir ’n groot verskeidenheid waterdiere. Kyk uit vir die geelbekooievaars en die krokodille, maar ook seldsame diere soos die groototters en rots-sprinkaanvoël – ’n onopvallende voëlspesie wat op net enkele plekke in Afrika voorkom.