Francois de Beer se Ford Ranger 2.5 TDi (4x2)

Op die afstandmeter? Tans 365 211 km

Hoeveel daarvan in die veld? So 6 000 km, hoewel hy ook baie swaar drawerk op grondpaaie doen.

Hoeveel eienaars? Ek het dit as ’n demonstrasiemodel gekoop. Kom ons sê dus maar ek’s die tweede eienaar.

Hoeveel het dit gekos? R159 000 in 2006.

Hoekom hierdie bakkie? Rangers het deur die jare hulle betroubaarheid bewys.

Het dit ’n bynaam? Nee wat, ons praat maar van die Ranger.

Waar was jy al daarmee? Ons is al ’n hele paar keer deur die Baviaanskloof en het al baie grondpad gery in die Oos-Kaap.

Jou droombestemming? Die Chobe Nasionale Park in Botswana.

Onklaar? Nog nooit nie, en ons was ook nog nooit in ’n ongeluk gewees nie.

Herstelwerk tot nou toe? Ek het die koppelaar op 290 000 km vervang, maar het nog nooit gaan staan nie.

Enige modifikasies? Nee.

Waarvan hou jy? Hy gee puik dieselverbruik (10 liter/100 km), selfs met ’n swaar vrag.

En waarvan nie? Jy sit nogals ongemaklik.

Jou beste herinnering aan die voertuig? Die Baviaanskloof.

Wat pak jy in vir ’n lang tog? My yskas, gereedskap en my vrou!

Sal jy deur Afrika ry daarmee? Enige tyd, solank daar ’n 4x4 naby is.

Met R10 000… Gooi ek nog ’ n tenk diesel in en dan vat ons maar weer die pad!