SA JAGTERS 70 JAAR OUD
DIE VOORLOOP
Diegene onder ons lesers wat kennis het van mampoerstook (wettig of onwettig) sal ook weet dat die ou stokers van ’n voorloop en ’n naloop praat. Die voorloop is die eerste produk wat uit die ketel kom – dis nog half waterig en het nie heeltemal die smaak van die vrug in die ketel nie.
Die voorloop van die stigting van SA Jagters as Jagtersvereniging was in Mei 1949 toe drie bekende jagters van daardie jare – George Hoppert, Antonie Goossens en Victor Verster – bymekaargekom het en die gesprek oor die stig van ’n jagtersvereniging begin vorm kry het.
DIE STIGTING
Hierdie gesprek wat deur die bogenoemde drie manne begin is, het meer materiële beslag gekry op Saterdag 1 Oktober 1949 toe ’n groep van 50 belangstellendes om drie-uur die middag in Pretoria by die dieretuin se koffiehuis bymekaargekom het. Tydens dié byeenkoms het hierdie groep die stigterslede van die destydse Transvaal Jagtersvereniging geword.
Die publiek se wenkbroue het gelig toe daar in die pers berig is dat wildbewaring een van die doelwitte van die nuut gestigte Jagtersvereniging is. Hoe kan jagters dan wildbewaarders wees? Vandag weet ons gelukkig van beter, maar die publiek dink dalk nog nie heeltemal só nie.
DIE NAAM EN RENOSTERS
In 1957 tydens die algemene jaar- vergadering is besluit om die naam van die Vereniging te verander na die Suid-Afrikaanse Jagters- en Wildbewaringsvereniging. En dit is die naam wat ons steeds dra.
’n Mens is geneig om te dink dat die bewaring van renosters eers in die laaste klompie jare ’n dringende saak geraak het, maar dit is nie die geval nie. Reeds in 1961 is ’n “aansienlike finansiële skenking” aan die Nasionale Parkeraad gedoen “om die renoster te help red”. Renosterbewaring is daarom geen nuwe kwessie vir die SA Jagtersvereniging nie.
DIE PLAN VIR 2019
Ons herdenk die stigting van SA Jagters naastenby elke 10 jaar. Vanjaar is die Vereniging 70 jaar oud en dit is goed om terug te kyk na gebeure wat in dié tydperk afgespeel het. Daar was heelparty hoogtepunte en sekerlik ook enkele laagtepunte. Ons het ’n verantwoordelikheid om erkenning te gee aan die werk wat ons voorgangers gedoen het. Hulle het dit vir ons moontlik gemaak om steeds vandag te kan jag en om ons belewenis van die veld, natuur, diere en voëls met ons kinders en kleinkinders te deel. As ons voorgangers nie die moeite gedoen het nie sou baie van ons nie vandag hierdie voorreg kon beleef nie.
Om hierdie verjaardag van SA Jagters te gedenk en te vier, word ’n hele paar gebeure beplan.
GEDENKBOEK
SA Jagters gaan vir die eerste keer ’n
gedenkboek uitbring wat die geskiedenis van die Vereniging saamvat. Die plan is om met behulp van ’n tydlyn ’n kort beskrywing te gee oor die gebeure vanaf die ontstaan van SA Jagters tot waar ons nou is, bykans 70 jaar later. Hierdie tydlyn sal aangevul word met brokkies nuus en inligting, asook interessanthede sowel as foto’s. Dit sal nie net handel oor gebeure nie, maar ook die mense, jaggeleenthede en soortgelyke relevante onderwerpe.
Die plan is om die boek uit te gee in die formaat van ’n koffietafelboek wat lekker sal lees, baie inligting en foto’s sal bevat, en ook die geskiedenis van SA Jagters en ander interessante gebeure sal beskryf.
Oom George Nell ’n voormalige Sekretaris van SA Jagters het aanvanklik opgetree as argivaris wat die feite, inligting en foto’s bymekaargemaak het en ons is baie dank aan hom verskuldig vir die rol wat hy hierin gespeel het. Ná oom George se afsterwe verlede jaar is hierdie rol oorgeneem deur prof. Pieter Potgieter (of dalk liewer oom Pottie soos baie van ons hom ken) wat ook vroeër vir vier jaar as President van SA Jagters gedien het.
Herman Jonker werk reeds vir die beste deel van ’n jaar al saam met, aanvanklik oom George en nou oom Pottie, aan die inhoud van die boek en dit belowe om ’n interessante en pragtige boek te wees wat ons verseker trots sal maak.
Ons beplan om die gedenk- boek by die 2019-Kongres bekend te stel en lede sal vooraf bestellings kan plaas. Bestellings vir dié boek sal later vanjaar open.
Diegene wat dalk nog bydraes vir die boek wil lewer soos ou foto’s, inligting of mooi jagstories, sal vinnig moet spring om die tydlyn te haal. Kontak dus so gou moontlik oom Pottie by pieter.potgieter@safricom.co.za
GEDENKMESSE EN JUWELE
Lede van die Vereniging weet reeds dat SA Jagters die ivoor wat ons van Nico van Rooyen geërf het, en wat begin verwaarloos het, gaan gebruik om juwele en hewwe vir messe van te maak.
Ons gaan deur die loop van die jaar ’n reeks gedenkmesse laat vervaardig wat aan lede en ook aan belangstellendes uit die publiek beskikbaar gestel sal word. Hierdie sal unieke handgemaakte messe in ’n genommerde reeks wees wat teen ’n billike prys aangebied sal word (maar hoe billik kan die prys van ’n handgemaakte mes dan nou wees?). SA Jagters het ’n hele span bekende en groot geeste opgelewer en ons sal aan hulle dink tydens hierdie proses. Ek kan sekerlik verkwalik word indien ek enigiemand sou uitlaat, maar ek wil tog waag om ’n klompie name te noem: Victor Verster, Lou van der Merwe, Nic van der Merwe, regter Henk van Dyk, Jim Cameron, Nico van Rooyen en Lucas Potgieter het elkeen ’n besondere rol gespeel en groot spore in die Vereniging getrap.
Ons beplan ook om ’n reeks knipmesse te maak wat ivoor op die hef sal hê. Hierdie messe sal ’n bietjie goedkoper wees en dus waarskynlik meer bekostigbaar as die handgemaakte messe. Verder het ons ook reeds ’n ooreenkoms met die bekende juweelvervaardiger Maryna de Klerk om van die ivoor te gebruik in ’n reeks juweliersware om ons 70 jaar-vieringe te gedenk. Omdat dit in groter maat vervaardig sal word, sal die pryse hiervoor baie billik wees. Dit sal ook aan die lede en die publiek beskikbaar gestel word.
JAGGELEENTHEDE
Onder leiding van die VP: Jagsake, Basie Bergh en die Bestuurder: Jagsake, Boetie Kirchner gaan SA jagters vanjaar as proeflopie ’n paar unieke jaggeleenthede uitloot. Die jagsakespan werk aan ’n McNab-jag, ’n tiervisvanggeleentheid en swoeg ook hard om ’n buffeljag iewers vir ons lede vas te maak. Hiermee wil ons bepaal hoe groot die belangstelling in sulke geleenthede is en indien dit groot is, sal ons dit in die toekoms verder uitbrei.
Anders as die vorige model wat ons gebruik het, waardeur jaggeleenthede op ’n tenderbasis beskikbaar gestel is, gaan hierdie drie nuwe geleenthede deur middel van ’n loting aangebied word. Die lid sal dus teen ’n vaste koste die kans staan om ’n jaggeleentheid of dalk ’n lekker visvanguitstappie te kry.
GEDENKGEWEER
Een van die voorstelle waaroor die raad in Maart sal moet besluit, is of hulle ’n gedenkgeweer of twee kan te laat bou wat aan lede uitgeloot sal word. In die verlede het die uitloting van gewere deur SA Jagters baie goeie reaksie uitgelok, nie net onder ons eie lede nie, maar ook onder die publiek. In die geval van die gedenkgewere sal die loting dalk moontlik net oop wees vir SA Jagterslede, omdat dit die bestaan van die Vereniging sal gedenk.
IGRF SE WÊRELDKAMPIOENSKAP
SA Jagters gaan ook vanjaar laat in Oktober die International Gallery Rifle Federation se Wêreldkampioenskap hier aanbied. Hierdie internasionale geleentheid sal ’n unieke eerste wees vir die Vereniging. Minstens ses lande het reeds hul deelname aan die kompetisie bevestig.
Die beplanning vir hierdie skietgeleentheid is reeds ver gevorder en die uitnodigings aan die ander ledelande van die IGRF is reeds “in die pos” (of eintlik e-pos... nie koeverte met seëls op nie).
Die voorbereiding van die skietbaan in Welkom waar die kampioenskap aangebied gaan word, vorder goed en ons sien uit na ’n puik kompetisie.
UITNODIGING
Ons nooi graag alle lede uit om enige idees en voorstelle wat van 2019 ’n nog meer besonderse jaar kan maak, aan ons te kommunikeer. Enige prakties uitvoerbare idees sal beslis aandag geniet.