ODN-munisipaliteit ontken klagte van bedrog
Die tonge het verlede week behoorlik geklap toe dit aan die lig gekom het dat raadslede van OGI, PA, Advieskantoor en bestuurslede van Saamstaan Suid-Afrika kriminele klagte teen die Oudtshoornmunisipaliteit by die polisie aanhangig gemaak het.
Suid-Kaapse polisiewoordvoerder, sers. Chris Spies, het bevestig dat 'n saak van bedrog Woensdag 30 Augustus geopen is.
Volgens Aurelia Mle, woordvoerder van die munisipaliteit, het hulle nog geen klagstaat ontvang nie en die munisipaliteit het in 'n verklaring uitgevaar teen die klagtes en die aantygings van bedrog ontken.
Die partye wat die klagtes gaan lê het se mediaverklaring lui dat dit ondermeer verband hou met bewerings van vervalsing van raadsdokumente om glo die aanstelling van die direkteur gemeenskapsdienste te fasiliteer. Die klagte impliseer verder ook dat dié beweerde vervalste aanbevelings aan die raad as akkuraat voorgelê is en aangedring is op die aanvaarding daarvan.
"Verdere klagte sluit in die oortreding van munisipale wetgewing met onreëlmatige aanstellings deur die vertraging om die aanbevelings van die LUR voor die raad te bring. Nog klagtes sluit in die onwettige aanstelling van die voormalige direkteur van beplanning en ontwikkeling in die pos as seniorbestuurder. Die posisie is met die aanstelling van die direkteur van die organogram verwyder; is nie begroot voor nie; en het waarskynlik ‘n onreëlmatige salarisbetaling vir Augustus te weeg gebring. Die aanstelling is verder gedoen sonder enige prosesse en die heraanstelling is sonder enige wettige ooreenkoms vervat in enige kontrak," lui die verklaring.
Dié partye sê dat hul ongelukkigheid by die LUR en Openbare Beskermer aangemeld is, maar sonder sukses.
Munisipaliteit maak beswaar
Die munisipaliteit het heftig beswaar gemaak teen die beskuldigings van bedrog. "Watter dokumentasie is vervals en waar is die bedrog? Die korrekte weergawes wat tydens die raadsvergadering aanvaar is, is aan die minister vir plaaslike regering in die Wes-Kaap, Anton Bredell, voorsien. Wat die aanstelling van die direkteur van gemeenskapsdienste betref was dit ten tyde van ‘n vorige direkteur, wat waarnemende munisipale bestuurder was, toe hierdie besluit geneem en genotuleer is."
Die munisipaliteit sê al die dokumente soos
ontvang van die LUR, is voor die raad ter tafel gebring.
"Die raad is ook daarvan bewus gemaak dat die vorige besluit ten opsigte van die aanstel van die paneel vir die direkteur gemeenskapsdienste, verkeerd genotuleer is aangesien daar in die aanhef tot die besluit, alreeds aangedui is dat die raad die paneel goedgekeur het, wat die kundige insluit. Die notule het aangedui dat die munisipale bestuurder die kundige moet aanstel wat teenstrydig met wetgewing is. Enige besluit wat teenstrydig met wetgewing genotuleer is, moet en kan tydens ‘n volgende raadsvergadering reggestel word. Daar mag nie besluite teenstrydig met wetgewing geneem word nie, en moet dit reggestel word, wat tydens die raadsvergadering gedoen is."