Borgtogaansoek teen Mooi uitgestel
Justice Mooi, een van die twee beweerde huurmoordenaars het verlede Vrydag vir ‘n borgtogaansoek in die Oudtshoornlanddroshof verskyn.
Hy is op 12 Desember verlede jaar in Port Elizabeth op ‘n klag van moord in hegtenis geneem.
Adv. John Ryneveld is deur die nasionale vervolgingsgesag aangestel om die staat in die saak te verteenwoordig. Hy het in die hof aangedui dat die staat ten sterkste borgtog teen Mooi teenstaan omdat die staat ‘n prima facie saak teen hom het.
Adjudant-offisier Martin le Roux, een van die vier ondersoekbeamptes, het vir die staat getuig. Volgens Le Roux se getuienis het Mooi kort na sy arrestasie, ‘n bekentenis by die Thembalethu-polisiestasie in George afgelê.
“Die bekentenis is op video vasgevang en is by ‘n onafhanklike beampte, kolonel Julies, afgelê. Soos met die bekentenis van Sixabiso Klip is Mooi voor die aflê van die bekentenis sowel as na die tyd na die hospitaal geneem om te bewys dat daar geen beserings opgedoen is tydens die aflegging van die bekentenis nie.”
Le Roux het verder getuig dat Mooi gesê het hy het wil nie regsverteenwoordiging hê nie.
Verdere getuienis wat teen Mooi tel is selfoonrekords wat hom, Magdaleen Titus en Klip met mekaar verbind en hulle al drie by die weermagbasis plaas die aand toe die moord gepleeg is. Dié rekords bewys volgens Ryneveld ook dat Titus deurentyd met Mooi gekommunikeer het. Daar is ook video-opnames wat die verdagtes in die saak bymekaar plaas. Klip inkrimineer ook Mooi in sy bekentenis. Mooi het geen bates of familie in Oudtshoorn nie en kan as ‘n vlugrisiko beskou word. Volgens Le Roux het Mooi ook reeds met die staatsgetuies ingemeng. Hy het glo Vrydag voor die hofverrigtinge begin het, Klip gedreig en gesê hy gaan hom toor indien Klip sou skuldig pleit.
Mooi se bekentenis
Tydens Ryneveld se ondervraging van Le Roux het hy dele van Mooi se bekentenis aan die hof voorgehou. Die bekentenis wat Klip afgelê het stem grootliks met die van Mooi ooreen. Mooi het egter ook in ‘n deel van sy bekentenis gesê wat die aand van die moord in die huis gebeur het.
Volgens Ryneveld het Mooi in sy bekentenis gesê dat hy en Vusumsi die aand van die moord sonder Klip in die huis ingegaan het. Titus het, soos hulle vooraf bespreek het, die kombuis se deur vir hulle oopgemaak. Titus het glo die hamer by hom geneem en Vusumsi is saam met Titus met die mes na Preston se kamer waar hy lê en slaap het. Sy het aan Mooi gesê dat sy die waaier in sy slaapkamer aangesit het om die geraas te verbloem en dat sy vir Preston en haar jongste dogter slaappille ingegee het. Le Roux het in die hof gesê dat die jongste dogter gewoontlik saam met haar ma in die kamer geslaap het en dat sy gewoontlik wakker word as haar ma kom lê, maar sy het nie dié aand wakker geword nie.
Na die moord plaasgevind het, het Vusumsi en Mooi na Klip wat in die voertuig gewag het, gegaan en hulle het gery.
Volgens Le Roux het die ondersoekspan die hamer na die persoon geneem by wie Klip dit geleen het. Die persoon het glo die hamer uitgeken, maar gesê dat een van die hamer se kloue intussen afgebreek is en dat dit heel was toe hy die hamer aan Klip geleen het.
Volgens ‘n ander deel wat uit Mooi se bekentenis voorgelees is, het hy en Vusumsi in Natasha Stuurman se huis gebly terwyl die moord beplan is en het hulle die aand van die moord met haar voertuig rondgery. In die bekentenis staan daar ook dat hul verblyf in George deur Titus gereël is.
Slotbetoë
Eugene Roos, Mooi se regshulpprokureur, het in sy slotbetoog gesê daar is geen getuies wat die staat kan aanbied om te bewys dat sy kliënt ‘n vlugrisiko is nie. Roos het ook gesê dat die bekentenis wat sy kliënt afgelê het ook nie beteken dat hy nie borgtog kan kry nie. Roos het ook in sy slotbetoog genoem dat Mooi aan hom gesê het hy het wel sy bekentenis onder dwang afgelê.
“My kliënt het op daardie stadium gevoel hy het geen ander uitweg as om die polisie iets te gee nie. Hy was vir ure deur verskeie mense, waaronder die speurder wat deur die weermag aangestel is, ondervra. Hy was ook nie toegelaat om ‘n prokureur te kry nie. My kliënt het ook gevra dat die ondervraging moet stop, maar ten spyte van sy pleidooie het hulle voortgegaan. My kliënt was onderdruk toe hy sy bekentenis af gelê het en die hof sal in die verhoor moet besluit of die bekentenis wel gewig dra,” het hy gesê.
Volgens hom het sy kliënt ook nie paspoort nie.
“Bloot omdat my kliënt in ‘n ander provinsie woon beteken ook nie dat hy nie vir sy verhoor sal opdaag nie. Daar is al voorheen borgtog aan persone van ander provinsies toegestaan.”
Ryneveld het in sy slotbetoog klem op die sterkte van die staat se saak gelê.
“Behalwe vir Klip se bekentenis en ook dié van die beskuldigde is daar selfoonrekords en ander video-opnames wat die beskuldigde met die wrede moord verbind. Hy het reeds ‘n staatsgetuie gedreig en hom bang gemaak. Dit opsigself is redes vir intimidasieklagtes.”
Ryneveld het verder gesê dat die publiek se belang by die saak ook in ag geneem moet word.
“Al die hofsake tot dusvêr, insluitende die een van die beskuldigde wat vandag voor die hof staan, is deur groot groepe belangstellendes bygewoon. Die mense het petisies geteken en plakkaatoptogte voor die hof gehou om te vra dat die hof nie borgtog aan die beskuldigdes moet toestaan nie.”
Volgens hom staan daar ook in die memorandum, wat aan die hooflanddros oorhandig is, dat die lede van die gemeenskap onveilig voel in hul eie wonings na die moord op die weermagbasis plaasgevind het.
Landdros Roelf Konstabel het die saak na Maandag uitgestel vir die uitspraak van die borgtogaansoek.