Tuinroete verloor 2 reuse in botsing
Twee families is in rou gedompel nadat 'n hulpafrigter van die Barbarians Rugbyklub, Lesley London (39) en 'n pa van vyf, Samuel (Seun) Smit (39) op Donderdag, 30 November in 'n kop-teenkop botsing op die N2 naby Mosselbaai dood is. Die oorsaak van die ongeluk, wat om ongeveer 08:20 gebeur het, is nog nie bekend nie.
Die KwaNonqabapolisiestasie ondersoek
‘n saak van strafbare manslag.
Lesley London
London was ongetroud en het nie kinders gehad nie en sou oor ‘n paar maande sy 40ste verjaarsdag vier. Hy het 'n kontrak gehad om brood aan skole in die omgewing af te lewer en was juis na 'n skool onderweg toe die ongeluk plaasgevind het. Hy was ‘n bekende gesig in sportkringe op Mosselbaai en ook met afrigting by Uniondale Rugbyklub se A- en B-spanne betrokke. London het gematrikuleer by Hillcrest Sekondêre Skool en het ‘n groot invloed op die omgewing se kinders gehad toe hy onder meer straatkrieket begin het.
Hy was ook by Hoërskool Sao Bras se sport betrokke.
London se roudiens vind môre plaas, op Saterdag, 9 Desember, om 10:00 by 'n woning by Morkelstraat 4 in Uitbreiding 23 en om 11:00 by die Nativity kerk.
Seun Smit
Smit het op Albertinia gewoon en het vir 'n heiningkontrakteur op Mosselbaai gewerk. Hy was ten tye van die botsing in sy werkgewer se Ford Ranger.
Smit se vrou, Ria het aan die Advertiser gesê hy laat vyf kinders agter. “Hy was ‘n man wat werk toe gegaan het en weer huistoe gekom het.”
Seun se kinders is 11, 9, 7 en 5 jaar oud. "Hy was 'n baie goeie pa vir ons kinders," sê Ria.
Smit se roudiens vind plaas op Woensdag, 13 Desember, vanuit die AGS Therunsville op Albertinia.