Koop drank op Sondae

Die Mosselbaai munisipale raad sal tydens hul maandelikse raadsvergadering vandag besluit of die handelsure vir alkoholiese drank gewysig moet word. Dit volg na talle klagtes van beide inwoners en toeriste veral oor die Desembervakansie dat Mosselbaai se handelsure nie tred hou met die nasionale tendens nie.

Sondae

Voorstelle dien voor die raad dat die handelsure uitgebrei moet word om onder meer drankhandel binne spesifieke ure op 'n Sondag toe te laat. Voorts sal die nuwe verordening wat in die vooruitsig gestel word, ook voorsiening maak dat groter bevoegdhede aan munisipale wetstoepassers gegee sal word om teen onwettige drankhandel op te tree.

'n Verdere voorstel is dat die voorgenome verordening onder meer die magte van wetstoepassers sal uitbrei om ook op te tree teen enige geraasstoornisse. Geraasoortredings sal ook in die voorgenome nuwe verordening vervat word.

Die voorstelle volg juis om die plaaslike ekonomie te stimuleer en die wettige drankhandelaars teen die onwettige handel in alkohol te beskerm deur handel op Sondae toe te laat, binne spesifieke, vasgestelde ure. Dit sal ook meebring dat handelaars se besighede beter gepolisiëer kan word.

Verlengde ure

Besighede sal by die plaaslike drankhandelkomitee kan aansoek doen vir verlengde standaardure en vergunnings sal, binne die gestelde raamwerk, vir tot 'n jaar geldig wees.

Indien die munisipale raad op Donderdag, 29 Maart die voorstel goedkeur vir 'n nuwe verordening vir die handel in alkoholiese drank, is die munisipaliteit voornemens om 'n intensiewe openbare deelname-projek van stapel te stuur sodat die gemeenskap se mening daaroor behoorlik gepeil kan word. Daarna sal die voorgestelde nuwe verordening met inaggenome die insette van die openbare deelname-proses weer voor die raad vir 'n finale besluit dien.