Fondsinsameling vir Huis Elsjé
‘n Suksesvolle fondsinsamelingsgeleentheid ten bate van Huis Elsjé het op Vrydag, 22 September in die Mosselbaai-stadsaal plaasgevind.
Die alombekende en veelsydige Lizz Meiring het opgetree as aanbieder en afslaer tydens die geleentheid en deurentyd met haar skerp humor, die gaste laat skater. Inspirasie spreker Christo Spies het tydens sy spreekbeurt oor hoop gepraat en dat mens altyd moet fokus op dit wat jy oor het in plaas van dit wat jy verloor het. Bekende krieketspeler Boeta Dippenaar het genoem dat verandering by onsself moet begin ongeag die omstandighede. Hierna het Jonathan Beukes die feit dat sport Suid-Afrika kan herenig, opnuut bevestig het. Na ‘n heerlike maaltyd en gesellige saamkuier het die veiling van wyn en kunswerke voortgegaan. Bekende plaaslike kunstenaar Frans Venter het 'n spesiale kunswerk vir Huis Elsjé geskilder met die tema, Hoop in ‘n soms dorre woestyn. Stef Kruger het verdere kleur aan die geleentheid verskaf met sy besonderse sang- en skryftalent. Die welkome geld wat ingesamel is, gaan 'n daadwerklike verskil by Huis Elsjé maak. Die suksesvolle aand is keurig deur die fyn hand van Janita Janse van Rensburg en Nakkie Zerwick beplan en aangebied.
ACVV Huis Elsjé versorg al die afgelope nege jaar persone met demensie in Mosselbaai en is finansieël hoofsaaklik selfonderhoudend en afhanklik van donasies uit die gemeenskap.