DIDIZA VRA MEER INLIGTING OOR VROT PAAIE
ENKELE weke nadat Agri SA ’n verslag oor swak landelike paaie en die groot ekonomiese skade wat dit die landbou berokken, aan me. Thoko Didiza, minister van landbou, grondhervorming en landelike ontwikkeling, oorhandig het, het sy Agri SA skriftelik gevra om aan te dui watter paaie dringende aandag verg.
Sy vra Agri SA om die name, nommers en koördinate van paaie te verskaf wat aanbeveel word vir herstelwerk, rehabilitasie of nuwe grond-deklae. “Die data sal ons help om ’n profiel van die status quo van paaie per distrik en munisipaliteit saam te stel sodat alle belanghebbendes byeengebring kan word om die probleme te takel.”
Volgens Didiza is die padinfrastruktuur van nasionale, provinsiale, munisipale en plaaspaaie ’n voorkeursaak om ekonomiese volhoubaarheid te verseker deur landbouprodukte veilig en vinnig te vervoer.
HELP SÓ
Mnr. Christo van der Rheede, uitvoerende hoof van Agri SA, verwelkom Didiza se skrywe en sê Agri SA se affiliasies is reeds besig met ’n opname.
Op ’n vraag hoe boere hul terugvoer by dié verslag kan voeg, het Van der Rheede gesê boere kan met die provinsiale affiliasies van Agri SA skakel om inligting deur te gee.
“Ons gaan dit ook sterk aanbeveel dat daar ’n manier gevind moet word om boere-unies en boere wat self landelike paaie herstel, te vrywaar van enige regsaanspreeklikheid.”
Altesaam 311 landbou-ondernemings het aan Agri SA se paaie-ondersoek deelgeneem, en het aangedui hulle het gemiddeld R200 000 per deelnemer skade gely weens swak paaie. Elkeen het ’n gemiddelde omsetverlies van 16% in die boekjaar gehad weens probleme met die vervoer van landbouprodukte op die swak paaie.