‘ESKOM GEE NIE OM’
Duidelik word die landbou, waaronder die boer of grondeienaar, in Suid-Afrika vertrap. Belastings, veiligheid, prysnememing . . . om maar net ’n paar probleme te noem.
Wat my veral pla, is dat die boer en grondeienaar maar verlief moet neem met dié vertrapping. Die werklikheid is dat die landbou gedienstig en gedweë die menigtes moet voed. Die bedryf word nie in ag geneem deur staatsdepartemente en semi-staatsinstellings nie.
Dankie aan die breë publiek wat die landbou verstaan en hul oë toemaak voordat daar geëet word.
As daar nou een semistaatsinstelling is wat vere voel vir die volhoubaarheid van die landbou, die landprodusent en die grondeienaar, is dit die groot sondaar in die breë ekonomie van Suid-Afrika – Eskom.
Vanuit eie ondervinding kan ek sê dat Eskom tans niks voel vir die boer se eiendom en die dierelewe op grond waaroor sy transmissielyne loop nie.
In die verlede was dit nooit die geval nie. As ’n boer of grondeienaar een of ander probleem met Eskom ondervind het, kon hy met Agrilek, ’n afdeling van Eskom, skakel. Binne dae is daar aandag gegee aan die probleem, en die probleem is opgelos.
Deesdae is dit beslis nie meer só nie, want Eskom het Agrilek gesluit.
Ek is reeds die afgelope twee jaar nie meer ’n kliënt van Eskom nie. Dit bring ongelooflike gemoedsrus, moet ek byvoeg. Eskom bly egter nou al sedert 28 Februarie 2019 in gebreke om aandag te gee aan twee eise wat ek ingedien het ten opsigte van saakbeskadiging en ’n verlies aan diere weens sy agterlosigheid.
By navraag aan ander boere en grondeienaars moes ek
hoor dat Eskom nie dadelik verantwoordelikheid aanvaar vir skade wat hy berokken nie en voete sleep om te kyk of die eiser moed opgee met navrae.
Ek het my saak per e-pos aan mnr. Jan Oberholtzer van Eskom gestel. Hy het dit dadelik na sy betrokke bestuurder aangestuur. Tot op hede is dit egter die een verskoning ná die ander, maar geen oplossing nie.
Al wat ek kan dink, is dat daar te veel generaals in Eskom se struktuur en te min troepe is. Daarom is daar geen vorderingsverslag ten opsigte van die uitwissing van die vyand – die boer in hierdie geval – nie.
JOHN THEUNISSEN
Beaufort Wes