SA stel internasionale Chenin blanc-standaard
Die beoordelaars van vanjaar se Standard Bank Chenin Blanc Toptien-kompetisie is dit eens dat Suid-Afrika se Chenin blanc nog nooit beter was nie.
Suid-Afrika het met vanjaar se Standard Bank Chenin Blanc Toptien-kompetisie die internasionale standaard vir die kultivar gestel. Só meen mnr. James Pietersen, voorsitter van die paneel beoordelaars.
Danksy die gesonde mededinging onder plaaslike wynmakers is die land volgens hom steeds die voorste bron van die opwindendste en heerlikste weergawes van dié druifsoort. “Hoewel die kategorie floreer, het dit nie ’n gees van selfgenoegsaamheid in die hand gewerk nie.
“Dit het duidelik geblyk uit vanjaar se 138 inskrywings, die toenemende getal areas waarin Chenin blanc aangeplant word, die groter benutting van dopkontak, meer natuurlike gisting en die gebruik van ’n groter verskeidenheid gistingsen verouderingshouers, van amforas tot ouer en groter vate – van beton-‘eiers’ tot tenks.”
Pietersen sê die beoordelingstandaarde is vanjaar selfs hoër as tevore aangesien nie-ingeskrewe bekroonde wyne vir die eerste keer as blinde maatstawwe gebruik is. “Die paneel moet die ingeskrewe wyne beoordeel binne die groter raamwerk van die beste wat in dié sektor beskikbaar is. Ek is bly om te kan sê dat selfs gemeet aan hierdie nie-ingeskrewe wyne, dié wat ons beoordeel het, nogtans uitstekend gevaar het.
“Dit spreek van die gretigheid onder die deelnemers om voortdurend op hul pogings van die verlede te verbeter en deurlopend standaarde in die kategorie te verhoog. Dus, hoewel die toptien hoofsaaklik uit vorige wenners bestaan, is daar ook nuwelinge soos Guardian Peak, Le Belle Rebelle en Lievland. Dit was die patroon die afgelope paar jaar, ongeag die oesjaar of wie die beoordelaars was.”
Vanjaar se wenners is (in alfabetiese orde): Bellingham The Bernard Series Old Vine Chenin Blanc Limited Release 2020 DeMorgenzon Reserve Chenin Blanc 2020 Guardian Peak Donkiesbaai Steen 2020
Ken Forrester Terre Noire Chenin Blanc 2020 Kleine Zalze Wines Vineyard Selection Chenin Blanc 2020
Kleine Zalze Wines Family Reserve Chenin Blanc 2020 Le Belle Rebelle Solitude Chenin Blanc 2020 Lievland Vineyards Old Vine Chenin Blanc 2020 Simonsig Wines Avec Chêne Wooded Chenin Blanc 2019 Stellenrust Old Bushvine Chenin Blanc 2020.
Stellenrust het reeds agt keer onder die wenners getel en DeMorgenzon sewe keer sonder onderbreking sedert 2015.
Die kompetisie is vanjaar vir die agtste keer gehou. Elk van die produsente van die toptien-wyne ontvang ’n kontantprys. Dié prys moet aangewend word vir die verbetering van die lewensgehalte van plaaswerkers en/of hul gemeenskappe.
Mnr. Ken Forrester, medestigter van die Chenin Blanc-vereniging, sê die plaaslike Chenin blanc-produsente se aptyt vir nuwe ontdekkings het daartoe gelei dat Suid-Afrika die Franse wynbedryf genader het met die voorstel dat hulle saam ’n genetiese navorsingsprojek van stapel stuur om besonderse Chenin blanc-klone wat spontaan voorkom, te identifiseer.
“Soos in Frankryk, het natuurlike mutasies met verloop van tyd hul verskyning in plaaslike wingerde gemaak. Die genomiese studie wat tans aan die gang is, is die eerste navorsingsprojek nóg oor kloonidentifikasie by Chenin blanc. Die verwagting is dat ons hierdeur waardevolle insigte sal bekom wat die beskerming van erfenisstokke betref, die opbou van Chenin blanc se aanpasbaarheid by die klimaat en die bevordering van produsente se ekologiese volhoubaarheid.
“’n Deel van die studie sal gewy wees aan die vestiging van ’n stewige, wetenskaplike grondslag vir die benutting van verskillende klone binne dieselfde wingerd.”
Mnr. Stephan van der Merwe, hoof van Standard Bank se handelsbankbedrywighede in die Wes-Kaap, het namens die beoordelaars uitgelig dat ouer wingerde die toptien-kompetisie oorheers het. “Die meeste van die toptien-wyne is gemaak van wynstokke wat minstens 30 jaar oud is. Die oudste is meer as ’n halfeeu gelede aangeplant.
“Ons weet uit die eerste fase van ’n studie wat deur Universiteit van Kaapstad se sakeskool onderneem word, dat die ouderdom van die wingerd beduidend tot die gehalte en gevolglik die prys van die wyn bydra. Dit dien toenemend as aansporing vir produsente om hul erfenis te bewaar. Ons hoop dat die gesamentlike kloonstudie met Frankryk hierdie neiging ’n verdere hupstoot sal gee.
“Die internasionale webinaar wat in November deur die Chenin Blanc-vereniging aangebied word, sal Chenin blanc-spesialiste ’n verdere geleentheid vir die uitruil van kennis op ’n teoretiese en praktiese vlak bied. Dit beloof werklik net goeie dinge vir die toekoms van dié druifsoort.”