Plaagbestryding
Met ’n natter somer wat voorlê, behoort saaiboere hulle voor te berei op insekplae wat kan voorkom. In Namibië en Oos-Afrika het sprinkane reeds vanjaar amok begin maak. Lees in hierdie afdeling meer oor watter raad en produkte maatskappye teen plae bied.
Plae soos die mieliestronkboorder en snywurm is gedugte teenstanders vir saaiboere in die somersaaigebied, terwyl slakke veral in die Wes-Kaap moeilikheid veroorsaak vir wingerd-, vrugte- en groenteboere.
Tans is dit egter migrerende rooi sprinkane in die Zambezistreek van Namibië wat boere in daardie land, Botswana en Suid-Afrika op die uitkyk hou vir dié verwoestende insek. Die rooi sprinkaan, wat gewoonlik in Noord-Namibië uitbroei, kan na Botswana migreer en boere in Limpopo, Noordwes en selfs so ver as Gauteng benadeel.
Mnr. Calle Schlettwein, Namibiese minister van landbou, water en grondhervorming, sê sedert die uitbreking die eerste keer op 12 Augustus aangemeld is, word verdere uitbrekings daagliks aangemeld. Dit is die tweede uitbreking vanjaar. Die vorige een was in Februarie.
Tot dusver het die sprinkane ’n gebied van net groter as 4 000 km2 binnegedring en meer as 500 ha weiding vernietig.
Dr. Gerhard Verdoorn van die Griffin-gifinligtingsentrum sê sprinkane wat in die suide van Namibië uitbroei, kan na Suid-Afrika migreer en probleme vir boere in dele van die Karoo veroorsaak.
SNYWURMS
Syngenta gee meer inligting oor snywurms en hoe om dié plaag te bestry (bl. 68). Dit is nou ’n kritieke tyd in die lewensiklus van die snywurm omdat dit saamval met planttyd in die somergraanproduksiestreek, wat gewoonlik ná die eerste reën in Oktober begin.
Snywurms is moeilike kalante om te bekamp, veral as jy nie hul eienskappe goed ken nie.
Die klein larwes wat uitgebroei het, sal byvoorbeeld eers bogronds op blare voed, maar ná die tweede vervelling trek hulle bedags ondergronds omdat hulle liggevoelig is.
In droë, warm toestande bly die larwes ondergronds waar hulle jong plantjies afvreet. Hulle kom dus nie in aanraking met kontakmiddels wat bo-op die grond gespuit is nie. Hiervoor het Syngenta goeie raad in sy promosie-artikel.
BESKERM MIELIES
Op eie bodem waarsku Bayer
teen skadelike insekte soos die mieliestronkboorder en die herfskommandowurm. Die ekonomiese skade in besmette mielielande kan enorm wees.
Die mieliestronkboorder se larwe sal tipies op jong, toegerolde blare voed en staan bekend as die topruspe. Groot skade word aan die krans aangerig. Wanneer die ouer larwes teen die stam af beweeg, beskadig hulle die groeipunt. Dit kan tot “dooie-hart-simptome” lei.
Bayer se kenners maan ook teen die voorkoms van die herfskommandowurm, wat die eerste keer in die 2016-’17-seisoen in Suid-Afrika opgemerk is.
Ondersoek mielieplante gereeld vir die kenmerkende skade wat hierdie larwe aanrig. Wees tydens inspeksies bedag op gaatjies in blare en mis van die herfskommandowurm.
Vensteragtige letsels kan op die blare voorkom aan die beginstadium van die besmetting.
SLAKKE
Hulle beweeg dalk stadig, maar die skade wat slakke in vrugteboorde, wingerde, groentelande en aan gesaaides kan aanrig, is noemenswaardig. Orchard Agrikem vertel op
bl. 72 meer oor die verskillende slakpille en middels teen slakke in sy arsenaal, asook hoe dit in verskillende omstandighede en weerstoestande getoets is.
Lees meer oor die reeks produkte wat vinnige en langdurige oplossings vir die bekamping van bruindop-, witdop-, toringen naakslakplae bied.
Verskaffers wat dié produkte verkoop en weet hoe suksesvol dit op plase gebruik word, gee ook hul mening van die Orchard Agrikem Prima-reeks.
Mnre. Arnold du Preez van Snail & Slug Solutions, Boetie Beukes van Viking op Riviersonderend in die Wes-Kaap en Hendrik Engelbrecht van Wenkem op Riviersonderend en Swellendam vertel self hoe doeltreffend dié reeks is.