BRITTE MAAK REG VIR LANDBOUROBOTTE
In Brittanje het die ontluikende landboutegnologiemaatskappy Small Robot Company aangekondig dat alles gereed is om die eerste
robotte van sy Tom-prototipe te vervaardig. Daarmee sal boere onkruid in hul graanlande deeglik kan karteer. Dit sal ook gebruik kan word vir oesskattings en weldra om die doeltreffende gebruik van onkruiddoders te toets.
Die eerste 10 sal na verwagting in Oktober 2020 gereed wees om verkoop te word.
Hierna sal Tom se ontwerp aangepas word vir massaproduksie. Die vervaardigingsproses word behartig deur Tharsus, ontwerper van gevorderde toerusting en robotika in Brittanje.
Tom kan tans 20 hektaar per dag op eie stoom dek, en in die proses 6 terabytes inligting insamel. Dit kan die fynste plantdetail optel danksy superfyn beeldresolusie. Die robot kan boonop heeljaar gebruik word, selfs in die slegste weer.
Ontwikkelingswerk gaan voort aan Tom se sogenaamde “weed zapper”-vermoëns, wat na verwagting teen einde 2021 gereed sal wees. Die oogmerk is dat die robot enige onkruid wat dit identifiseer, sommer daar en dan kan bespuit.
Onder Small Robot Company se eerste kliënte tel Waitrose & Partners en die National Trust wat die gebruik van robotika op hul plase wil uitbrei. Vroeë veldtoetsing is reeds onderweg op 20 plase in Brittanje.
Die maatskappy hoop dat sy robotte teen 2023 reeds sowat 20 000 ha in Brittanje sal dek, en wil mettertyd ook na Amerika en Kanada uitbrei.
Die navorsing agter Tom word gefinansier deur die Britse regering.