Toyota gee hupstoot aan SA ekonomie
Toyota Suid-Afrika Motors het in sy derde voorlegging op die beraad oor die stand van die motorbedryf by Kyalami bekend gemaak die maatskappy het van 2019 tot 2020 altesaam R4,28 miljard in Suid-Afrika belê.
Toyota SuidAfrika Motors (TSAM) se beleggings in SuidAfrika strek oor verskillende afdelings, waaronder die verspreiding van onderdele by sy Atlaspakhuis in Johannesburg en verskillende vervaardigingsprojekte by die Prospectonaanleg in Durban.
Die leeueaandeel daarvan – altesaam R2,43 miljard – is toegewys vir die vervaardiging van ’n nuwe passasiersmotormodel by Prospecton vanaf Oktober 2021. Dié nuwe passasiersmodel vervang die produksielyn vir die Corolla (nie die Quest nie), wat vanjaar eindig.
TSAM maak ook met trots bekend dat die eerste vervaardiging van ’n Toyotahibriedvoertuig in Afrika hierby ingesluit is.
Mnr. Andrew Kirby, voorsitter en uitvoerende hoof van TSAM, het gesê die maatskappy versterk met hierdie belegging sy langtermynverbintenis tot plaaslike vervaardiging, asook die SuidAfrikaanse motorbedryf.
“Die belegging sal ’n bykomende R2,85 miljard vir die SuidAfrikaanse ekonomie per jaar en ongeveer 1 500 nuwe werkgeleenthede beteken.
“Dit sou nie moontlik gewees het sonder nywerheidsbeleidsekerheid in die vorm van APDP2 nie. Ek bedank ál die belanghebbendes wat die weg na die praktiese toepassing van die nuwe beleidsriglyne in 2021 help baan het.”
Die portefeulje sluit ook in: ■ Aansienlike verbeterings in die plaaslike produksie van die HiAce Ses’fikile (R450 miljoen).
■ Die verhoging in die produksievolume van 14 000 tot 18 000 eenhede per jaar, wat 270 nuwe poste beteken (R91 miljoen).
■ Die vestiging van ’n verpakkingsaanleg ter ondersteuning van TSAM se boustelonderneming vir die Hilux in Kenia (R20 miljoen).
TSAM belê ook R365 miljoen om die grootte van sy Atlaspakhuis te verdubbel van 40 000 m² tot 80 000 m². By voltooiing in 2021 sal dit die grootste pakhuis vir motoronderdele in die Suidelike Halfrond wees.
Die maatskappy het ook ’n aantal lopende projekte van 2019 tot 2020, waaronder ’n belegging in die nuwe Corolla Quest en verskeie opgraderings vir geriewe by die aanleg.
Dié beleggings beloop altesaam R928 miljoen.
TOEWYDING AAN SUID-AFRIKA
Dr. Thabi Leoka, ’n onafhanklike ekonoom, word as volg aangehaal: “Ek wil Toyota SuidAfrika Motors bedank dat hy sy toewyding aan die SuidAfrikaanse ekonomie getoon het deur werk te skep, terwyl dit lyk of byna elke sektor poste afskaal.”
TSAM het die afgelope tien jaar meer as R12 miljard in die SuidAfrikaanse ekonomie belê op die gebied van vervaardigingsgeriewe, toerustingopgraderings en sy handelaarsbedrywighede.