Syngenta gee stukrag aan ontwikkeling van landbouleiers
Die AgAcademy som die kern op van Syngenta se ‘boer slim’-filosofie deur kandidate toe te rus om beter mense, boere en lede van die samelewing te word. Gevolglik word meer programme ook aanstaande jaar aangebied.
Landbouweekblad en Witzenberg-PALS se onlangse grondsimposium het plaasgevind slegs ’n week nadat ’n sektor meesterplan vir die hoenderbedryf – die grootste landbousektor in Suid-Afrika – tydens pres. Cyril Ramaphosa se beleggings konferensie aangekondig is.
Die meesterplan vir die pluimveesektor, wat deur die regering en belanghebbendes in die bedryf opgestel is, is op 6 November in Johannesburg onderteken. Die plan het ten doel om hoendervleisverbruik te verhoog en te verseker dat al hoe meer plaaslik geproduseerde hoendervleis verbruik word.
Die landboubedryf was ook onlangs die katalisator vir die PPGI, ’n openbare-private-groeiinisiatief wat 22 sektore in die ekonomie verteenwoordig en op ongekende vlakke van samewerking tussen die regering en die private sektor berus.
Ramaphosa het vroeër vanjaar die PPGI, onder die gesamentlike leiding van dr. Nkosazana Dlamini-Zuma, minister in die presidensie vir beplanning, monitering en evaluering, dr. Johan van Zyl van Toyota International, en mnr. Roelf Meyer van die In Transformation Initiative, aangekondig om sektorplanne te ontwikkel om ekonomiese groei te bewerkstellig.
NUWE VISIE
Teen hierdie agtergrond het Syngenta en Graan SA aangekondig dat die Syngenta Grain Academy van volgende jaar af as die AgAcademy for Leaders bekend gaan staan. Die rede vir die naamsverandering is dat hierdie uitsonderlike sake-en leierskap ontwikkelingsprogram voortaan oop is vir jong leiers van oor die hele landbouspektrum. Voorheen was die akademie op graanprodusente toegespits.
“Sewe jaar se suksesse en die kaliber mense wat opgelei is, het ons oortuig dat die tyd ryp is om uit te brei en meer kandidate aan die program bloot te stel,” sê mnr. Antonie Delport, besturende direkteur van Syngenta Suid-Afrika.
“Die landbou het vindingryke en versiende leiers nodig, en die goeie ontwikkelinge van die afgelope jaar is ’n duidelike teken dat sulke leiers se insette aangegryp word.”
LEIERSPROGRAM
Die Grain Academy is gebore uit Syngenta se wens om landbouleiers te ontwikkel wat die toekoms van die bedryf op plaaslike, streeks- en nasionale vlak aktief en gunstig kan beïnvloed. Met die samewerking van die Universiteit van die Vrystaat se sakeskool en Thinking Fusion Africa, wat die program aanbied, het Suid-Afrika se eerste landbougerigte leierskap s program die lig gesien.
Die program is ontwerp om jong leiers toe te rus om leiding te neem, en anders te dink en op te tree ten einde ’n daadwerklike verskil te maak in hul ondernemings, hul gemeenskappe en in die georganiseerde landbou in Suid-Afrika.
Die AgAcademy for Leaders streef dieselfde doelwit na, maar net op’ n groter skaal en in vennootskap met die Noordwes Universiteit se sake skool.
Voorheen is een program per jaar aangebied, maar hulle beoog om in 2020 vier programme oor “Leadership in the Connection Economy” aan te bied. Die program bestaan uit 10 klaskamerdae, opgedeel in 3 sessies, met plek vir 25 tot 28 kandidate. Die resultaat is dus minstens 50 nuwe landbouleiers per jaar.
Die impak van landbouleiers wat wyer dink en inisiatief neem, is sigbaar in mense soos mnr. Nick Serfontein, voorsitter van die Sernick-groep, wat in ’n ope brief aan Ramaphosa gevra het dat kommersiële produsente ingesluit moet word by die planne vir grondhervorming. In reaksie daarop is Serfontein op die presidensiële adviespaneel aangestel.
“Dit is een ding om genooi te word om aan die tafel te sit, maar dit is iets heeltemal anders om dan konstruktief, kreatief en taktvol aan die proses deel te neem,” sê Delport.
“Dit is wat ons met AgAcademy wil bereik – ons wil leiers ontwikkel wat geleenthede kan skep en toegerus is om die idees uit te voer.”
BENUT ALLE KANSE
Die kandidate word aangemoedig om hulself nie as studente te sien nie, maar as veranderingsagente, dus mense wat die toekoms van Suid-Afrika kan en moet verbeter.
Die opbouende momentum wat in die landbou sigbaar is, moet volgehou en aangevuur word. Daarom bestaan die behoefte om meer en beter toegeruste leiers in die veld te stuur.
“Produsente kan nie bekostig om tonnelvisie te hê nie,” sê mnr. Thabo van Zyl van Bothaville, wat die Grain Academy-program in 2016 voltooi het.
“Die kursus het my gewys hoe om my boerdery na waarde te skat, te beplan, strategieë uit te werk en ’n leier te wees. Ek het geleer die mense op die plaas werk nie vír my nie, maar sáám met my. Produsente moet by verandering aanpas, groei en ontwikkel, of anders gaan jy jou kanse verspeel.”
Die Grain Academy het ’n nuwe wêreld vir me. Brenda Tlhabane, ’n alumnus van 2017, oopgemaak wat betref menseverhoudinge en hoe sy aan leierskap uiting gee.
“Ek is daaraan herinner dat ’n mens jouself goed moet ken voordat jy na ander mense kan uitreik. Die belangrikste was egter dat die program ons met
’n duidelike prentjie gelaat het van wat ons in die landbou wil bereik en wat ons as jong mense self kan vermag.”
BETER MENSE, BETER LEIERS
Met nuwe medeborge aan boord wat die AgAcademy in staat stel om sy invloed wyer te laat geld, is Syngenta opgewonde oor die program se toekomspotensiaal.
“Syngenta se leuse is ‘Bringing Plant Potential to Life’. Gevolglik wil ons help om mense se potensiaal te ontwikkel, veral wat leierskap betref, en op hierdie manier help om rigting te gee aan die vorming van die SuidAfrikaanse landboubedryf se toekoms,” sê Delport.