Opbrengs groot ondanks droogte
Vanjaar se Weeg-en-Wen-opbrengskompetisie, wat vanjaar vir die vierde keer agtereenvolgens gehou is, was die laaste een wat DuPont Pioneer Suid-Afrika aangebied het. Ondanks moeilike klimaatstoestande het ál die inskrywings goeie resultate opgelewer.
Die Weeg-en-Wen-kompetisie het ’n geleentheid aan boere gebied om hul landboukennis uit te brei en by medeboere te leer, sê me. Germa Kieser, bemarkingsbestuurder van Pioneer Suid-Afrika.
Die kompetisie het, soos vorige jare, inskrywings van ’n hoë gehalte gelok, ondanks moeilike toestande in die meeste produksiestreke.
Boere kon in verskeie afdelings vir mielies, sojabone en sonneblomme inskryf.
MIELIES
■ Mnr. H.F. Cilliers van die plaas De Hoek by Douglas in die Noord-Kaap het die kategorie vir mielies wat onder besproeiing verbou is, met die kultivar DKC 65-60BR en ’n opbrengs van 20,871 t/ha gewen.
■ Mnr. Stephen Krüger van die plaas Jagtershoek by Viljoenskroon in die Vrystaat het die kategorie vir mielies wat op watertafel-saailande verbou is, met die kultivar P2865WBR en ’n opbrengs van 7,5648 t/ha gewen.
■ Mnr. Danie le Roux van die plaas Kleindoorns by Schweizer-Reneke in Noordwes het die kategorie vir mielies wat in die westelike produksiestreek verbou is, met die kultivar DKC 77-77BR en ’n opbrengs van 11,154 t/ha gewen. Le Roux boer vir PGL-boerdery (mnre. Pieter en PG van Zyl) saam met Cofco International.
■ Mnr. Jannie Schoeman boer op die plaas Bankfontein tussen Middelburg en Bethal in Mpumalanga. Hy het in die oostelike produksiestreek met die kultivar PAN 4R-511R gewen. Die opbrengs was 14,73 t/ha.
■ Mnr. Hendrik Fourie boer op die plaas Memiesrust tussen Bethlehem en Clarens in die Oos-Vrystaat. Hy het die wenopbrengs van 11,426 t/ha in die Oos-Vrystaat met die kultivar DKC 71-44B behaal.
■ Mnr. Barry van Wyk boer op die plaas Rietfontein by Fochville, Gauteng. Hy het die wenopbrengs van 7,99 t/ha in die sentrale produksiestreek met die kultivar DKC 74-74BR behaal. Hy boer saam met ’n toegewyde span werkers.
■ Mnr. Josh Butt boer op die plaas Prairie Farm by Kamberg in KwaZulu-Natal. Die kultivar PAN 3R-724BR het aan hom die wenopbrengs van 16,226 t/ha in dié provinsie besorg. Hy boer saam met sy pa, oom en ’n neef.
SOJABONE
■ Mnr. Cobus Botha boer sedert 1998 heeltyds (die afgelope 16 jaar saam met sy swaers). Die boerdery het voorheen as die H&T Honiball-boerdery bekend gestaan. Deesdae is die naam 2HB Farming. Hulle boer tussen Winterton en Bergville in KwaZulu-Natal. Vanjaar het hy in twee afdelings gewen, naamlik sojabone onder besproeiing met die kultivar DM 5953 RSF (’n opbrengs van 5,540 t/ha), en in KwaZulu-Natal met die kultivar KZN P64T39R (’n opbrengs van 4,355 t/ha).
■ Mnr. Danie le Roux boer op die plaas Kleindoorns by Schweizer-Reneke in Noordwes. Die sojaboonkultivar P64T39R het aan hom die wenopbrengs van 4,464 t/ha in die westelike produksiestreek besorg.
■ Mnr. B.J. Rossouw van die Boetine-boerdery by Nigel, Gauteng, het vanjaar vir die eerste keer aan die kompetisie deelgeneem. Hy het by Delmas met die sojaboonkultivar RA 560R van Santa Rosa die wenopbrengs van 4,907 t/ha behaal.
■ Mnr. Barry van Wyk het in 2018 én vanjaar die beste opbrengs in die sentrale produksiestreek behaal met die kultivar Don Mario 6.8. Hy het vanjaar met dié kultivar ’n opbrengs van 4,099 t/ha behaal. Hy boer op die plaas Rietfontein by Fochville.
SONNEBLOMME
Mnr. Gerrit Knoetze van die plaas Uitkyk, Wolmaransstad, het vanjaar ’n opbrengs van 4,014 t/ha met die sonneblombaster P65LL02 van Pioneer behaal.
Knoetze het al voorheen aan die kompetisie deelgeneem én gewen – in 2017-’18 met die kultivar Phb 65A70 en ’n opbrengs van 3,3727 t/ha.
Knoetze, wat al 17 jaar lank boer, en sy seun, Marinus, boer saam onder die naam Wesvaaldelwerytrust. Hulle boer met kontantgewasse, soos sonneblomme en mielies, Bonsmarabeeste en Merino-Landskape. Die gewasse word op droëland aangeplant.