Landbou-unies wil meer dienste lewer
BY Agri SA én TLU SA was daar vanjaar ’n klemverskuiwing om meer dienste aan lede te bied en vir hul lede waarde toe te voeg.
Agri SA, wat sedert November 2015 reeds R19 miljoen vir droogtehulp ingesamel en aan boere in nood oorhandig het, het vanjaar sy hulppoging uitgebrei. ’n Rampsentrum onder leiding van mnr. Willem Symington, ondervoorsitter van Agri Noord-Kaap, is gestig en me. Andrea Kamfer, ’n permanente ramphulpbestuurder, is aangestel om ook ander rampe, soos dieresiektes, vloede en brande, te help bestuur.
In die 2018-’19 boekjaar het Agri SA-geaffilieerdes, wat kommoditeitsorganisasies en sake-ondernemings insluit, sowat R447 miljoen aan transformasieprojekte bestee.
Saam met die R314 miljoen wat in 2017-’18 bestee is, beloop die totale besteding sedert die organisasie sy vorige transformasieverslag in 2018 gepubliseer het, sowat R761 miljoen. Altesaam 167 008 mense het al by die projekte baat gevind.
DINAMIES
By TLU SA was ’n daadwerklike poging om die organisasie te omskep in ’n nuwe, dinamiese organisasie met ’n nuwe logo, webblad en klem op sosiale media. Mnr. Louis Meintjes, TLU-voorsitter, sê in die proses het die ledetal vanjaar met sowat 2 000 toegeneem.
By die jaarkongres is verskeie kommersiële projekte ook bekend gestel, onder meer ’n landbousektorbeleggingsmaatskappy waarbinne verskeie projekte begin is om voordele vir lede te beding, soos ’n voorsorgfonds en begrafnisvoordele. Lede kan aandele in die maatskappy bekom.
Daarby is TLU SA besig om ’n korporatiewe bank op die been te bring om lede finansieel te ondersteun, ’n digitale TV-kanaal word beoog en ook ’n finansiële welstandsdiens om lede met onder meer boedelbeplanning, testamente en regshulp te help.
Die organisasie beoog ook ’n landboukoöperasiestelsel waar
binne boere kan saamspan vir beter bedinging en risikoverspreiding. Vir boere wat hul plase verloor, word alternatiewe behuising op plase gesoek.
In Maart vanjaar is die Suider-Afrikaanse Agri-inisiatief (Saai), onder die voorsitterskap van dr. Theo de Jager van stapel gestuur. Hy beskryf Saai as ’n aanvullende organisasie gemik op familieboerderye wat boere met saakgerigte krisisse wil bystaan. Hulle steun op die infrastruktuur en hulp van verskeie ander organisasies, soos AfriForum, die Instituut vir Rasseverhoudinge en die FW de Klerk-stigting.