‘Hou by vyfjaarplan, al is seisoen op ’n naaldpunt’
HOEWEL die nuwe somerseisoen op ’n naaldpunt gebalanseer is, moet boere nie die groter prentjie miskyk te midde van weerrisiko’s en swak ekonomiese prestasie nie. Boere moet steeds hul vyfjaarplanne in ag neem, want dit gáán weer reën, het prof. Johan Willemse op sy kwartaallikse werksessie oor die landboumark aan boere gesê.
“Die groot risiko in hierdie tyd is dat as jy niks doen nie en pessimisties bly, jy die verkeerde besluite neem. Daardie pad neem jou ondertoe.”
Saaiboere in die Vrystaat en Noordwes wag tans angstig op voldoende reën om te plant. Veeboere se weiding raak kritiek en baie boere moet steeds hul beeste winterlekke gee om sodoende die diere se kondisie te behou.
Volgens mnr. Johan van den Berg, weerkundige by Santam Landbou, gaan die eerste twee weke van November deurslaggewend
vir die res van die seisoen wees. Hy is steeds optimisties dat reën in die tweede helfte van die seisoen sal uitsak.
PLANTVOORNEMENS
Willemse het daarop gewys dat boere ondanks swak vooruitsigte in die somerreëngebied voornemens is om 9,51% meer mielies as in die vorige produksiejaar te plant. As dit ’n normale reënjaar word, kan groter aanplantings en goeie weerstoestande die prys laat daal. Mielieboere moet verskansing teen latere dalings oorweeg.
“Ek dink dis ’n goeie tyd om vir jou ’n vloerprys vas te stel vir geel- en witmielies. Niemand van ons kan ’n prysdaling van R500/t verwerk nie,” het Willemse gesê.
Volgens die regering se jongste raming sal die ekonomie vanjaar
met net 0,5% groei. Dié stadige groei sal na verwagting volgende jaar voortduur.
“Mnr. Tito Mboweni, minister van finansies, het mooi planne, maar niks is tot dusver al deurgevoer nie. Daar is min vooruitsigte dat ons nuwe kapitaal kan lok.”
Die groot vraag is of die regering sy uitgawes voldoende kan besnoei om ’n skuldstrik te vermy, het Willemse gesê. Teen hierdie agtergrond is dit onwaarskynlik dat die rand gaan versterk.
Willemse het voorspel dat die geldeenheid teen vlakke van R16 of hoër teen die Amerikaanse dollar sal verhandel, eerder as dat dit weer tot R12,50 sal versterk. ’n Swakker rand is wel goeie nuus vir mielieboere, want dan styg die plaaslike prys.
VLEISBEDRYWE
Voerkrale en pluimveeprodusente, wat reeds geknou word deur laer marges en verbruikersweerstand teen hoër vleispryse, sal egter nie die prysdruk verwelkom nie.
“Rooivleispryse is tans nie ideaal nie, maar eintlik moes dit met so ’n swak ekonomie in duie gestort het. As weerstoestande na normaal terugkeer en boere weer kuddes begin bou, kan die prys herstel,” het Willemse gesê. Hy het bygevoeg ekonomiese groei is noodsaaklik vir ’n groter vraag na bees- en skaapvleis.
‘Niemand van ons kan ’n prysdaling van R500/t verwerk nie.’