'BOERE KÁN 80 000 TON ROSYNE LEWER'
Rosynboere ervaar oor die afgelope tien jaar bestendige groei. Die verwerkingsvermoë is meer as die huidige ongeveer 70 000 ton wat jaarliks gelewer word, wat mededinging om dié produk verhoog. Die situasie is dus gunstig vir produsente – as die weer net wil saamspeel. Volgens mnr. Ferdie Botha, bestuurder van Raisins SA, kan 68 500 ton rosyne vanjaar geoes word. Dit is ’n daling van 4% in die opbrengs teenoor 2018.
“Die afgelope tien jaar het die Suid-Afrikaanse rosynbedryf se volume met meer as 35% gegroei. Die seisoene 2016-‘17 en 2017-‘18 was rekordoesjare met onderskeidelik 65 593 ton en 71 107 ton. Die belangrikste redes vir die groei is ’n hoër dollarprys vir rosyntjies, ’n gunstige wisselkoers en die beskikbaarheid van beter kultivars. Die markvooruitsigte is steeds gunstig. Boere kan binne die volgende drie jaar moontlik 80 000 ton produseer,” sê Botha.
In die Olifantsriviervallei was daar amper geen koue-eenhede die afgelope winter nie en verlede Julie was gemiddeld 3,5 °C warmer as die gemiddelde op langtermyn, sê mnr. Gert Engelbrecht van Vinpro op Vredendal.
Kultivars, soos Sultana, wat uiters gevoelig is, het ’n aansienlike hoeveelheid trosse afgegooi. Dieselfde is ondervind met korente wat die helfte van die oppervlak van aangeplante rosynkultivars beslaan. Die verwagting is dat die oes dieselfde as die vorige jaar aan die Oranjerivier sal wees. In die Olifantsriviervallei is die verwagting dat die oes groter as in 2017-’18 sal wees, maar nie dié van 2016-‘17 sal ewenaar nie.