Vrugbare Ankole kraai koning(in)
Voorkoms is mooi, veral by die Ankole met sy sierlike, lang horings, maar vrugbaarheid kraai koning. Dis immers wenslik dat ’n koei elke jaar ’n kalf grootmaak. Hoë vrugbaarheid is dus die belangrikste eienskap waarvoor mnr. Dail van Rensburg in sy Ankolestoetery selekteer omdat dit belangrik vir vooruitgang en wins is. Swaar speenkalwers is ook belangrik.
Die Ankole is ’n gewilde bees in Suid-Afrika, onder meer danksy sy majestueuse horings. Horinglengte is egter nie al waarvoor mnr. Dail van Rensburg van die plaas Kalkpan by Delareyville en Stella selekteer nie. Vrugbaarheid kry voorkeur. As ’n koei nie dragtig raak nie, betoon hy geen genade nie en sy word uit die kudde verwyder. Die uitsondering is tydens ’n ernstige droogte, soos die afgelope jare gereeld gebeur het. Andersins word nie-dragtige, vroulike diere uitgeskot, sê hy.
Nie eens stoetkalwers word ontsien wanneer Van Rensburg selekteer nie. ’n Speenkalf moet vinnig groei en swaar speen, met ’n gesonde balans tussen dié twee kriteria.
Van Rensburg boer sedert 1983 op Kalkpan en besit ook ander plase by Delareyville en Stella. Benewens die Ankole, wat hy reeds in die 1980’s aangeskaf het, het hy ook Santa Gertrudis- en Romagnola-beeste in sy Rensbou-stoeterye.
DIE ELITEKOEI
Die Elitekoei Rensbou DT 08/0010 is elf jaar oud, het reeds agt kalwers gehad en haar tussenkalfperiode (TKP) is 395 dae. Sy is ’n koei met goeie kapasiteit, goeie sprong van rib en handhaaf altyd ’n goeie kondisie op die veld. Die TABEL toon die koei se besonderhede.
Van Rensburg beskryf haar as ’n tipiese Ankolekoei met lang, sirkelvormige horings. Sy is baie vroulik en het ’n gladde haarkleed en korrekte bouvorm. Die koei loop gemaklik.
Die Ankole is bekend om sy hoë vrugbaarheid, sê hy. Die ras dateer so ver terug as die farao’s in Egipte en verskyn op baie van die hiërogliewe wat op klip uitgebeitel is. Hulle kom hoofsaaklik van Uganda en omliggende lande. Die vraag neem toe en boere wat hulle koop, doen dit omdat dit as ’n buitengewone beesras beskou word en hulle van iets besonders hou.
Die horings se lengte en basis word afsonderlik gemeet. Bulle het korter, dikker horings as die koeie met langer, dunner horings het, net soos by gemsbokke. Van Rensburg het bulle met ’n horingomtrek van tot 60 cm en ’n lengte van tot 90 cm. Koeie se horings word tot 1,1 m lank.
TEEL EENVOUDIG
Die kern van stoetboerdery is om dit eenvoudig te hou.
“Moenie dinge ingewikkeld maak nie. Probeer voortdurend om die wins te verhoog. Droogtes kom ál gereelder voor. Daarom is my voorrangsaak om die veldbestuur op die hoogste vlak te hou en só te verseker die beeste kan optimaal produseer.”
Die beweidingstydperk per kamp is so kort moontlik en die rustyd so lank moontlik om die gras kans te gee om saad te skiet en te vermeerder om ’n groot voerbank vir droë tye te skep.
BO: Die Ankole-elitekoei, DT 08/0010, is elf jaar oud en het al agt kalwers gehad. Haar tussenkalfperiode is 395 dae. Sy het goeie kapasiteit en goeie sprong van rib. FOTO: DAIL VAN RENSBURG
INLAS: Mnr. Dail van Rensburg. FOTO: CHARL VAN ROOYEN