HIER IS DIE LNR SE BESTES

DIE Landbounavorsingsraad (LNR) het vanjaar vir die 40ste keer sy toppresteerders in die Nasionale Vleisbeesaantekening-en-veeverbeteringskema aangewys.

Elite-eerbewyse is aan telers van 21 koeie gemaak. Altesaam 18 bulle het eerbewyse in die Spesiale Prestasie Toetsklas ontvang.

Bulle afkomstig van ses verskillende beesrasse het ook Platinum-eerbewyse ontvang, terwyl die Nasionale Ontwikkelende Rooivleisprodusent van die Jaar en die gesogte Nasionale Vleisbeesverbeteringskudde van die Jaar ook aangewys is.

Dr. Ben Greyling, die LNR se navorsingspanleier, het by die oorhandigingseremonie gesê die skema is reeds byna 60 jaar oud en het ’n sentrale rol gespeel in die verbetering van die genetiese potensiaal van die nasionale kudde deur die toepassing van aantekeningdienste en bykomende tegnologie.

WENNERS

Mnr. Cristopher Sparks van Harrismith het die toekenning vir die Nasionale Vleisbeesverbeteringskudde van die Jaar ontvang.

Mnr. Nsikayekhaya Shabalala van Afrikan Farms van Amersfoort in Mpumalanga het die nasionale Kommersiële Vleisbeesprodusent van die Jaar-prys ontvang.

Dit gee erkenning gee aan ’n kommersiële vleisbeesboer wat aktief deelneem aan prestasiemeting en wat vordering toon in sy of haar eie boerdery deur die toepassing van bestaande prestasiemetingstegnologie.

Me. Thokozile Mathelela van die plaas Schoonoord naby Hendrina in Mpumalanga het die LNR-eerbewys vir die nasionale Ontwikkelende Rooivleisprodusent van die Jaar ontvang.

Sy is gekies uit nege finaliste – almal deelnemers aan die LNR se Kaonafatso ya Dikgomo skema, wie se kuddebestuurspraktyke, sowel as kuddeprestasie oor die afgelope jaar aansienlik verbeter het.

Mnr. Cois Harman van Marico is aangewys as die LNR se nasionale Mentor van die Jaar.