WÊRELD SE EERSTE ‘HERLEWINGSWOL’ KOMVANSA
DIE wêreld se eerste wol afkomstig van herlewingslandboupraktyke is gereed vir die mark – en kom van Suid-Afrika.
Volgens die Savory-instituut in Suid-Afrika is die eerste skeersel wol wat aan sy kriteria vir gunstige ekologiese gevolge voldoen, voorverlede week by die internasionale wolmark in Port Elizabeth afgelaai. Dit word vandeesweek opgeveil.
Die Savory-instituut is ’n internasionale organisasie wat hom beywer vir omgewingsvriendeliker boerderypraktyke. Die instituut se Ecological Outcome Verification (EOV)-sertifisering gee kopers die versekering dat die wol afkomstig is van ’n plaas waar die grond besig is om te herleef.
“Handelsmerke en ondernemings wat EOV-wol op die Port Elizabeth-wolbeurs aankoop, sal vroeë ondersteuners wees van ’n stelsel waar holistiese bestuur geverifieer word om gunstige gevolge vir grondvrugbaarheid, biodiversiteit en wateropberging te behaal,” luidens die verklaring van die Savory-instituut in Suid-Afrika.
MIGRASIEPATRONE
Mnr. Neil Evens, die eienaar van dié skeersel wol, boer tussen Cathcart en Hogsback in die Oos-Kaap. Hy sê die doel van die EOV-sertifisering is nie om geld te maak nie, maar om verbruikers te oorreed om eerder produkte te koop wat gunstig vir die ekologie is.
Evens en sy vrou, me. Robyn Conroy, bestuur die afgelope 20 jaar hul grond en vee volgens holistiese beginsels. Hulle boer met skape en beeste wat hulle in groot troppe bestuur om natuurlike migrasieprosesse na te boots. Hulle sê sedert hulle dié benadering begin volg het, het hul grond se drakrag en produksie verhoog.
Evens se hele skeersel Merinowol het EOV-sertifisering. Hy sê daar is sprake van modehuise wat in die wol belang stel. Hulle sal met kopers in Suid-Afrika moet saamwerk om die wol op die ope mark te koop.
NIE NET WOL
Volgens Evens is die tegnieke wat die Savory-instituut voorstaan, daarop gemik om deur grondbestuur koolstof uit die atmosfeer te onttrek en in die grond vas te lê. Dit konsentreer nie spesifiek op wolboerdery nie.
“Dit gaan eerder daaroor om die omgewing op te bou, maar ons kan steeds goeie wol lewer terwyl ons dit regkry,” sê hy.
Die EOV-sertifisering is volgens die instituut se webwerf die afgelope drie jaar ontwikkel. Dit word in ander lande toegepas by onder meer vleis-, suiwel- en leerprodukte. Vir ’n boerdery om in aanmerking te kom, moet dit sekere uitkomste vir grondgesondheid, biodiversiteit en ekostelselwerking behaal.
Gesertifiseerde boerderye sal op ’n internasionale lys van verskaffers verskyn, vanwaar kopers toegang kry tot produkte wat volgens herlewingsbeginsels geproduseer is. –