NUWE SLUITMEGANISME VIR HEDENDAAGSE TYE

Mnr. Ettienne Kock, ’n Suid-Afrikaanse ingenieur, patenteer nou ’n revolusionêre deurslot wat as ’n lem oor 80% van die deur se kant strek en in ’n gleuf in die raam inskuif as die deur gesluit word.

Hy sê tradisionele deurslotte is ontwerp vir 400 jaar gelede se behoeftes, terwyl die hedendaagse misdaadsituasie ’n ander benadering vereis. Deure met ’n tradisionele slot kan gewoonlik oopgeskop of met ’n stuk yster oopgedwing word, of ’n kenner kan die slotmeganisme sonder ’n sleutel oopmaak. Met Kock se ontwerp is dit egter nie moontlik nie.

Met sy ontwerp word die las oor 80% van die deur versprei en die sterkte van die deur maak nie soveel saak nie. Dit werk ook nie met ’n sleutel nie. Die slot kan meganies oop- en toegesluit word of gestel word om met afstandbeheer of ’n selfoon te werk. Dié elektro-meganiese sluitstelsel kan ’n deur en veiligheidshek in minder as ’n sekonde sluit.

Die deur kan deel vorm van ’n kluis, dit kan as gewone toegangsdeure benut word of saam met ’n veiligheidshek gebruik word. Die gebruiker het die keuse of hy die deur en veiligheidshek saam wil oop- en toesluit of net die deur oopsluit, terwyl die veiligheidshek toe bly. PRYS: Op aanvraag.

NAVRAE: Mnr. Ettienne Kock, e-pos: info@ noentrylocks.com, sel 073 200 1852.