SPANWERK IS HUL LEUSE
Die Barnards van Dejema is ’n hegte gesin wat glo respek en spanwerk is die geheim vir ’n suksesvolle boerdery en besigheid.
NPlaastroue met regte, egte boerekos is die beste soort troue. Só glo die Barnard-gesin van Dejema in die pragtige Waboomskraal-streek.
Hier in die Suid-Kaap, tussen die Karoo en die see, het Dean en Carla Barnard ’n suksesvolle plaas-onthaallokaal, Oppie Plaas, op hul familieplaas tot stand gebring. En regte, egte boerekos, op die boeremanier gemaak, is dan ook wat gaste daar kan verwag.
Die hegte Barnard-gesin bestuur die besigheid as ’n spanpoging. Carla tree op as onthaalkoördineerder en sit hand by in die kombuis. Dean se ma, Mariana, is ’n beplanner en kok van formaat. Sy het vir 15 jaar ’n suksesvolle konfytbesigheid bedryf, wat sy gesluit het om haar volle steun aan die onthaallokaal te gee. Saam met haar goeie vriendin Elize Janse van Rensburg maak hulle al die kos vir elke geleentheid. Die manne in die familie staan reg as hul hulp met enigiets benodig word.
Oppie Plaas is bekend vir die beste hoenderpastei, varknek en skaapboud. Maar waarvan die gaste op troues eenvoudig nie genoeg kan kry nie, is hul pampoenkoekies met karamelsous. Hulle maak ’n allemintige 7 000 pampoenkoekies per jaar vir gesellighede!
’n Ander trefferresep is Elize se heerlike kerrie-afval, ’n resep van haar ma. “Ek het by die beste geleer hoe om afval te maak,” sê Elize. “En ek kan ’n afval silwerskoon skraap. Dis baie belangrik en só het my ma my ook geleer.” Aangesien Elma so lief is vir kerrie-afval, het hulle besluit om dit vir haar voor te berei. Daarmee saam maak Mariana nóg ’n familie-gunsteling – ’n gestolde beetslaairing. Perfekte pasmaats!