2 QUANTUM FOODS | Lae voerpryse gee hupstoot

Quantum Foods sê die aansienlik laer voerpryse en die uitbreking van hoogs aansteeklike voëlgriep was die afgelope boekjaar die twee grootste faktore hom beïnvloed het. Die groep se inkomste het met 4% tot R4,052 miljard gestyg – inkomste uit sy Suid-Afrikaanse bedrywighede met 2,5% en inkomste uit bedrywighede in ander Afrika-lande met 27,4%.

Vanweë die groot mielie-oordragvoorraad ná vanjaar se rekordoes word betreklik lae mieliepryse volgende jaar verwag, selfs al is reënval in mielieproduksiegebiede vanjaar net gemiddeld.

“Internasionaal bly mielie- en sojaboonvoorrade voldoende. Dié faktore behoort te verseker dat die koste van Quantum Foods se belangrikste produksiemiddele redelik bly,” lui hul verklaring.

Die waarde van die rand en moontlike verdere uitbrekings van voëlgriep bring egter onsekerheid. “As die rand teen die Amerikaanse dollar verswak, kan dit in die komende jaar ’n beduidende invloed op Quantum Foods hê.

“Enige verdere uitbrekings van voëlgriep kan ’n vernietigende invloed op die Suid-Afrikaanse pluimveebedryf hê. Die geografiese verspreiding van Quantum Foods se plase sal die potensiële invloed verminder. Die groep het egter ’n paar groot geriewe wat baie nadelig deur ’n voëlgriepuitbreking geraak sal word. Alle moontlike maatreëls word getref om Quantum Foods-plase teen voëlgriep te beskerm,” sê die maatskappy.

Reeds voordat voëlgriep uitgebreek het, was daar oor die algemeen dalende produksiesyfers in die eierbedryf omdat hoër voerkoste marges verlaag het. Quantum Foods sê Suid-Afrikaanse verbruikers is steeds geldelik onder druk.

Dit voorspel niks goeds vir groei in proteïenverbruik nie. —