Afrikanerbeesvleis maak geskiedenis
Afrikanerbeesvleis het die eerste in sy soort in Suid-Afrika geword om ’n eie, geregistreerde handelsmerk, AfriBeef, te kry. Die telersgenootskap sê dit bied gemoedsrus aan verbruikers wat op soek is na vleis van ’n hoë gehalte wat volgens die beste prakt
Rooivleis is onlosmaaklik deel van Suid-Afrika se voedselherkoms. Noem die verskillende snitte, en mense raak liries oor verskillende teksture, vleissagtheid en smaak. Elkeen het ook sy eie voorliefdes. Die Afrikaner-beestelersgenootskap het “Original Afrikaner Beef” (AfriBeef) as ’n gehalteproduk by die Departement van Landbou, Bosbou en Visserye geregistreer. Dit gaan gepaard met ’n minimum produksie-en-leweringstandaard. Die doelwit is om te verseker dat Suid-Afrikaners ’n waarborg het dat die vleis wat hulle aankoop, elke keer murgsag en geurig is en op ’n volhoubare wyse voorsien word.
Dié nismarkvleis is nou beskikbaar in eksklusiewe vleisdeli’s en uitgesoekte restaurante en sal volledig deur die waardeketting naspeurbaar wees.
“Navorsing bevestig Afrikanerbeesvleis is van die beste in Suid-Afrika. Die vleis het die hoogste frekwensie van die dubbelsagt- heidsgeen, goeie marmering, ’n fyn grein en geurigheid. Afrikanerbeesvleis bied ’n alternatief aan die gesofistikeerde verbruiker vir wie gehalte en gesondheid belangrik is,” sê dr. Pieter de Kock, voorsitter van die Afrikaner-beestelersgenootskap.
HERKOMS NASPEURBAAR
Die unieke eienskappe van Afrikanerbeesvleis het met die ontstaan van die voedselrevolusie vroeg in die 21ste eeu gelei tot ’n groeiende vraag daarna as ’n nisproduk op die plaaslike en internasionale mark. Die telersgenootskap het besef dat daar ’n toenemende mark vir dié beesras se vleis bestaan en het vernuwende sakebeginsels en beste praktyke saam met bedryfsleiers vasgestel. Dit is gedoen om die genetiese eienskappe en gehalte van die produk te verseker, met volle naspeurbaarheid in elke stap van die waardeketting. ’n Gesamentlike handelsmerk is daarna geregistreer.
Die registrasie van Afrikanerbeesvleis as handelsmerk het begin nadat mnr. Rudi Liebenberg, hoofsjef by die Mount Nelson-hotel in Kaapstad, die verhaal van die oudste inheemse beesras in Suid-Afrika, die Afrikaner, aan die vleisdisse op sy spyskaart wou koppel. “Aangesien Afrikanerbeesvleis die sagste en sappigste beesvleis is, met ’n 96% teenwoordigheid van die dubbelgeen vir sagtheid en bekroon is as een van die smaaklikste biefstukke in Suid-Afrika naas die Japannese Wagyu, was dit die ideale keuse vir sy spyskaart,” verduidelik Pieter.
Mnr. Konstant Bruinette, stoetteler en
raadslid van die telersgenootskap, het die grondslagwerk om die AfriBeef-handelsmerk wettig en korrek daar te stel, asook die protokol vir die registrasie, behartig.
“Konstant het ’n aantal abattoirs as slaggeriewe laat registreer en verskaffers geïdentifiseer wat die vleis sal versprei. In hierdie stadium is die verspreiders mnre. Johan Pienaar van Let’s Meat in Pretoria en Johann Botha van Hygenic Vleismark in Witbank.”
Pieter sê sedert Oktober verlede jaar word daar tweeweekliks vleis gelewer vanaf Pronk Afrikaners in die Bosveld. Hierdie beeste word by die Thabazimbi-abattoir geslag, wat deur mnr. Johan Maritz van die Suid-Afrikaanse Vleisbedryfsmaatskappy (Samic) geïnspekteer is.
“Johan (Maritz) het ook die plaas besoek waar die Afrikaners vandaan kom, en hy het seker gemaak dat die boerdery aan ál die vereistes voldoen. Hy was ook teenwoordig tydens die slag van die beeste om te bevestig dat die protokol korrek toegepas word.”
Om te verseker dat slegs Afrikanerbeeste vir die projek gebruik word, moet elke teler by die telersgenootskap as verskaffer registreer, waarna die beeste volgens ’n nommerstelsel ingesluit word om te verseker dat hul identiteit en herkoms naspeurbaar is. Me. Lauren Tissier van die telersgenootskap is hier aan die stuur van sake.
VLEIS VERDIEN ’N PREMIE
Die eerste 50 beeste wat reeds ingevolge die projek gelewer is, was 20 maande tot 26 maande oud en was van klas A en klas AB. Hulle is afgerond op hawerruvoer en het ook ’n lusern- en kopmeelrantsoen ontvang. Die beeste het geen groeistimulante of antibiotika ontvang nie. “Die vleis van hierdie beeste is teen ’n premie van R3 ekstra per kilogram verkoop, gemeet aan die markprys. Twee persent van die prys gaan aan die telersgenootskap. “Verdere Afrikanerbeestelers is reeds geoormerk om vleis aan die mark te voorsien,” sê Pieter.
Die vleis met die Original Afrikaner Beef-stempel is gerig op die nismarkverbruiker. Dit bied ongeëwenaarde verbruikersgenot met ’n gehalteproduk wat volhoubaar gelewer word, sê Pieter. “Die klem is op natuurlike produksiemetodes. Vergeleke met ander tipiese produksiemetodes bied dié Afrikanerbeesvleis verskeie algemene voordele, waaronder: Besonderse sagtheid, geur en smaak. Meer gesonde omega 3-vetsure, asook ’n gesonde verhouding tussen omega 3- en omega 6-vetsure. Minder skadelike LDL-cholesterol en meer gunstige HDL-cholesterol. Minder kalorieë. Geen onnatuurlike groeihormone of stimulante nie. Geen teenwoordigheid van oorblywende antibiotika nie. “Verbruikers kan ook gemoedsrus hê dat die produk volgens beste praktyke voorsien en gelewer is, dit volledig naspeurbaar is deur die waardeketting en dat die Afrikanerbees-gene geverifieer is,” sê Pieter.
SKEMA DALK UITGEBREI
Afgesien van die voordele aan die verbruiker, bied die skema ook voordele vir die boer. “Hy kan by ’n gestruktureerde program aansluit wat ’n raamwerk skep om waarde tot sy produk toe te voeg en sodoende ’n premie te verdien,” sê Pieter
Hy sê die telersgenootskap is opgewonde oor die nismark vir Afrikanerbeesvleis. “Ons moedig telers aan om Afrikanerbeeste te teel, hetsy stoet of kommersieel, om in die groeiende vraag te voorsien. Daar word beoog om ’n R10/kg-premie bo die markprys te verdien met die verskaffing van dié unieke produk aan spesfiek die restaurant- en hotelbedryf.
“Aangesien die Afrikanerbees intensief, ekstensief en ook saam met wild aangehou kan word, is dit die ras om in jou vleisbemarkingsprogram te gebruik en goeie wins te verseker.
“Na gelang van die vraag kan die skema uitgebrei word na Afrikaner-kruisbeeste, maar dan slegs met sekere rasse wat oor uitsonderlike vleisgehalte beskik sodat die gehalte van die AfriBeef-handelsmerk nie in die gedrang kom nie,” sê Pieter.
NAVRAE: Mnr. Philip de Waal, sel 082 783 0011; me. Lizette Vermaak, sel 082 412 2868. Die Afrikaner-beestelersgenootskap hou op 17 Maart ‘n AfriBeef-werksessie, asook sy jaarvergadering by La TresBien in Witbank. E-pos: afcattle@ intekom.co.za