Piesang-en-Amarula-brood-enbotterpoeding met karamelvla
Broodpoeding is ’n lekker bederf, maar ook ’n slim manier om brood wat nie meer vars is nie, te gebruik. Die karamelvla verg ’n bietjie moeite, maar die eindresultaat is beslis die moeite werd.
4 lang broodrolletjies 100 ml sagte botter, vir smeer 4 groot piesangs, geskil en in skyfies gesny 250 ml melk 125 ml room 3 ekstragroot eiers 125 ml Amarula-likeur 10 ml vanieljegeursel 45 ml kaneelsuiker 60 ml geroosterde amandelvlokkies
Poeding: Sny die broodrolletjies in skyfies. Smeer elke skyfie met sagte botter en maak toebroodjies met skyfies piesang tussen-in. Herhaal die proses met al die brood, botter en piesang. Pak die piesangtoebroodjies langs mekaar in ’n gesmeerde oondbak. Klits die melk, room, eiers, likeur en vanieljegeursel saam en giet oor die brood. Laat staan vir 30 minute sodat die eiervla goed kan intrek.
Voorverhit die oond tot 160 °C. Sprinkel die kaneelsuiker oor die poeding net voor dit in die oond gesit word. Bak vir 45-60 minute, tot die vla gestol en die poeding goudbruin bo-op is. Sprinkel die amandelvlokkies oor, skakel die oond af en laat staan die poeding vir nog 15 minute in die oond. Dit gee die amandels net genoeg hitte om lekker te rooster. Karamelvla: Klits 3 ekstragroot eiergele en
60 ml strooisuiker goed saam. Verhit 125 ml melk en 125 ml room in ’n kastrol tot net onder kookpunt. Voeg dit by die eiergeelmengsel en roer goed. Giet terug in die kastrol en verhit stadig tot die mengsel begin verdik (maar nie kook nie). Laat afkoel tot kamertemperatuur. Sit 180 ml suiker, 60 ml water en 2 ml
suurlemoensap saam in ’n ander kastrol en verhit oor lae hitte tot die suiker gesmelt is. Verhit tot kookpunt en kook tot ’n donker karamelkleur. Roer 125 ml room by en verhit tot glad. Meng die karamel en vla saam en sit dit voor by die poeding. Lewer 8-10 porsies.