Twee wynmakers by gilde ingehuldig
TWEE Stellenbosse wynmakers het hulle by die uitsoekgeledere van die Kaapse Wynmakersgilde aangesluit.
Mnre. Bruwer Raats van Raats Family Wines en Morné Vrey van die landgoed Delaire Graff is die jongste toevoeging tot die gilde. Die gilde het in 1982 ontstaan en bestaan uit 47 van Suid-Afrika se mees gerekende wynmakers. Die wynmakers het ’n gemeenskaplike visie om die Suid-Afrikaanse wynbedryf te verbeter deur wêreldklaswyn te maak en transformasie te ondersteun.
Lidmaatskap geskied op uitnodiging.
Raats het 16 jaar gelede begin wyn maak en is veral bekend vir slegs Chenin blanc-en Cabernet francwyn. Hy is ook lid van die Chenin blanc-vereniging en van die Premium Independent Wineries in Suid-Afrika (PIWOSA). Hy spog met vier vyfster-eerbewyse in die Platter-gids.
Vrey is al sewe jaar lank keldermeester by Delaire Graff en tree gereeld op as lid van verskeie proepanele en studiegroepe. Sy wyn het al ses keer vyf sterre in die Platter-gids behaal en lof ingeoes by vooraanstaande kompetisies, soos die Old Mutual-trofee-wynskou, Veritas, Decanter en Councours Mondial. Mnr. Tim Atkin, Britse wynkommentator, het Vrey in 2015 as Jong Wynmaker van die Jaar aangewys.
Mnr. Miles Mossop, nou vir die tweede jaar voorsitter van die gilde, meen albei nuwe lede is ’n aanwins. “Bruwer is baie bedrywig met die bemarking van sy eie wyn, sowel as Suid-Afrikaanse wyn in die algemeen. Hy is wyd bekend as ’n maker van uitsonderlike wyn. Die string eerbewyse op Morné se kerf wys dat hy ’n talentvolle wynmaker is. Hy is vernuwend en altyd aan die eksperimenteer om die gehalte van sy wyn te verbeter,” sê Mossop.
NUWE BESTUURSPAN
Mossop word deur mnr. Boela Gerber van Groot Constantia ondersteun as ondervoorsitter. Mnr. David Nieuwoudt van die Cederberg Private Kelder is tesourier, mnr. Kevin Grant van Ataraxia is keldermeester en me. Andrea Mullineux van Mullineux & Leeu Family Wines behartig die gilde se bemarking.