HOOP FLIKKER OP VIR LANDBOUSAKE
EKONOMIESE groei, verwagte beter weerstoestande en hoop dat die komende produksiejaar meer werksgeleenthede sal bring, stem landbousakelui vir die eerste keer in ’n lang tyd weer optimisties.
Dié sienings het in vanjaar se derde kwartaal die Agbiz-IDC-indeks oor landbousakevertroue beduidend laat verbeter. Die indeks was vir vyf agtereenvolgende kwartale onder die vlak van 50 punte, en het in die derde kwartaal met 13 punte tot by 60 verbeter die hoogste sedert die derde kwartaal van 2014, volgens mnr. Wandile Sihlobo, hoof van landbousakenavorsing by die landbousakekamer Agbiz.
Die vooruitsigte vir La Niña- of normale weerstoestande en verwagte goeie winteroeste het waarskynlik gelei tot groter vertroue wat betref algemene landboutoestande.
Die indeks meet sienings in 10 subindekse. Die indekspunte het in drie subindekse gestyg en in sewe gedaal. Vertroue in uitvoervolume het met 17 indekspunte tot 33 gedaal, hoofsaaklik weens die droogte en gevolglike laer produksie. Laasgenoemde het waarskynlik ook die daling in vertroue oor omset, netto bedryfsinkomste en markaandeel veroorsaak.
Die droogte is waarskynlik ook die rede waarom vertroue oor debiteurevoorsiening vir swak skuld met 43 punte tot 32 gedaal het, hoewel hoër kommoditeitspryse in sommige gebiede deels vir laer produksie vergoed het.
Vertroue oor finansieringskoste het met 61 punte tot 31 geval weens verwagtings dat rentekoerse voor einde vanjaar kan styg en finansieringskoste dus sal styg.
Vertroue rakende kapitaalbelegging het met 7 indekspunte gedaal tot 60, wat volgens Sihlobo wys op toenemende kommer oor politieke en beleidsonsekerheid.
–
Landbouweekblad