Oplossings vir suikerrietbedryf
Hoewel goeie reën uitkoms sal bring, het twee maatskappye vernuwende idees wat boere intussen in die droogtegeteisterde suikerrietgebiede kan help.
KwaZulu-Natal se suikerrietboere kan trots wees op maatskappye in dié provinsie wat suikerproduksie doeltreffender maak. Mnr. Richard Nicholson, bestuurder van ekonomiese navorsing by die Suid-Afrikaanse Suikerrietkwekersvereniging, sê ’n afname van 34% is in die 2015-’16-seisoen in droëlandproduksiegebiede waargeneem.
Die 2016-’17-seisoen se oesskatting wys droëlandgebiede gaan nou 25% minder suikerriet lewer as in ’n jaar met ’n normale klimaat.
Aanvullend tot genoeg reën is vindingryke oplossings nodig om produktiwiteit vinnig te verbeter. Twee maatskappye in KwaZulu-Natal wat gereed staan om suikerrietproduksie met hul produkte en kundigheid te ondersteun, is Bell Equipment en BASF Agricultural Specialities.
VERLORE TONNE
BASF se laboratorium en aanleg in Durban lê sedert 1995 klem op die vervaardiging van plaagdoders en entstowwe. Abacus® (reg.nr. L8048, Wet 36 van 1947) is een van die produkte met verskeie voordele vir graangewasse en suikerriet.
“Ons is in ons noppies met die vermoë van Abacus® om boere te help om beter oeste te behaal,” sê mnr. André Pretorius, bemarkingskommunikasiebestuurder vir gewasbeskerming by BASF.
“Ons het goeie terugvoering van boere gekry wat gewasbeskermingsmiddels gebruik het, al was hul reënvalsyfers ondergemiddeld. Die volgende seisoen kan ander probleme oplewer met langtermynvoorspellings van gemiddelde en bogemiddelde reën. Suikerrietboere moet daarom voorsorg tref teen swamsiektes, soos bruinroes en taanroes.”
Abacus® het benewens sy swamdodende eienskappe ook ’n reeks ander voordele wat dit ’n winsgewende belegging in die suikerrietboer se arsenaal vir gewasbeskerming maak.
Só het behandelde suikerrietgewasse in ’n plaaslike BASFproef ’n verbetering van 10-19% in opbrengs getoon vergeleke met onbehandelde lande. Die beste resultaat is by die suikerrietkultivar N12 aangeteken. Die onbehandelde N12-suikerriet het 122 t/ha gelewer en die behandelde landerye het 19% méér gelewer met ’n oes van 145 t/ha.
Mnr. Sean Stiles, gewasbestuurder by BASF, sê die plant moet egter steeds reën kry.
“Droëlandboere aan die Noordkus het veral swaargekry weens uiterse droogtetoestande en verskeie moes noodgedwonge hul suikerriet vir veevoer sny.”
Abacus® verbeter waterverbruik. Behandelde gewasse het minder water as onbehandelde gewasse nodig om dieselfde oes te lewer. As sistemiese en translaminêre swamdoder word alle dele van die plant beskerm vir optimale groei. Die beskermende en genesende werking beteken ook die plant herstel goed as dit beskadig word.
Die verhoogde daaglikse CO2-opname en verbeterde assimilasie van stikstof lei tot beter plantgroei en dra uiteindelik by tot ’n hoër opbrengs.
“Die opbrengs op belegging HEEL BO: BO: in ’n gewasbeskermingsmiddel, soos Abacus®, is báie beter as wanneer jy dieselfde bedrag in die bank laat om rente te trek. Suikerrietboere in die Daltonomgewing in die Middelland kan daarvan getuig. Hulle het ’n puik opbrengs op hul belegging in gewasbeskerming gesien deur die inkomste per hektaar aansienlik te verhoog,” sê Sean.
DRIEWIELER
Wat vindingrykheid in die werkswinkel betref, is die eg Suid-Afrikaanse maatskappy Bell Equipment aan die voorpunt. Mnr. Irvine Bell het die maatskappy in 1954 begin toe hy landboumasjinerie herstel het op ’n suikerrietplaas naby Empangeni aan die Noordkus van KwaZulu-Natal.
Bell Equipment is uit die suikerbedryf gebore en het hom van daardie eerste ontwerp af toegespits op betroubare, bekostigbare oplossings vir boere.
Die noue verwantskap met die suikerrietboere in KwaZuluNatal het vinnig gegroei danksy Irvine se vernuwende idees rondom suikerriethantering.
Só het hy ’n selflaai-suikerrietsleepwa en ’n oorhoofse hyskraan vir plaaslike boere ontwerp. Dié nuwe toerusting het produktiwiteit en veiligheid op suikerrietplase baie verbeter.
Irvine het reeds in die vroeë 1960’s die bestaande suikerrietstroopproses met nuwe laai- en vervoertoerusting vergemaklik. Die maatskappy se driewiel- suikerrietlaaier het ’n omwenteling in die bedryf gebring. Boere kon nou danksy die veel groter beweeglikheid van die laaier en sy gryphaak riet vinnig en akkuraat in waens laai. Die driewieler is in 1964 gepatenteer en was die eerste meganiese suikerrietlaaier in sy soort.
Die jongste weergawe van die driewiel-suikerrietlaaier kan ewe goed in die landerye of by laaisones werk. Die 125A-model is in ’n drie- óf viersilinderweergawe beskikbaar en is met ’n 0,36 m2gryphaak toegerus. Die drie- en viersilenderenjins lewer onderskeidelik 33 kW en 46 kW.
Die 220A-laaier (46 kW) het ’n gryphaak met ’n kapasiteit van 0,42 m2 wat ’n vrag van 1 000 kg kan hanteer.