Clover gedy te midde van melkkrisis

DIE suiwelmaatskappy Clover het ’n styging van R9,8 miljoen in inkomste aangekondig, 6% beter as verlede jaar se vertoning. Sy kernverdienste het met 11,7% tot R356,6 miljoen gestyg.

Mnr. Johann Vorster, uitvoerende hoof, sê dié styging, vanaf verlede jaar se hoë basis, is onder uitdagende bedryfs- en ekonomiese toestande bereik.

“Die eerste [helfte van die jaar] is gekenmerk deur ’n ooraanbod van onverwerkte melk en gevolglik laer verkooppryse, en die tweede deur ’n ernstige landwye droogte wat gelei het tot ’n laer produksie van melk en hoër insetkoste.”

Verder het ’n swakker wisselriewe koers tot hoër as verwagte koste-inflasie gelei. Hy sê daar was vroeg in die lente verlede jaar een van die grootste ooraanbiedinge van melk in 16 jaar en Clover het hul kleinhandelsprys met 5% verlaag om die mark te beskerm. Boere in die noorde van KwaZulu-Natal en op die Hoëveld is baie erg deur die droogte, hoër voerpryse en die onbeskikbaarheid van voer geraak. Volgens Vorster het Clover pryse verhoog om die primêre bedryf te beskerm.

PREMIE

Gewoonlik lei die opbloei van produksie in die lente tot die maatskappy wat sy winterpremie aan produsente ophef. Volgens Vorster is ’n besluit oor die winterpremie tans onder oorweging.

“Ons betaal die winterpremie aan ons Oos-Kaapse produsente weens die baie lae melkvloei in dié streek gedurende die winter.”

Volgens een Oos-Kaapse melkboer (wat nie aan Clover lewer nie) is die huidige prys per liter gemiddeld R4,70 en styg dit tot sowat R4,85 na gelang van die persentasie vastestowwe.

In hierdie stadium betaal Clover in sekere gebiede ook ’n groeipremie van 30c/liter vir melk bo en behalwe die vorige jaar se produksie om weens uitbreiding in die maatskappy se behoeftes te voorsien. Clover se boere kan voordeel trek uit ’n liggingspremie na gelang van hul nabyheid aan verwerkingsaanlegte.

UITVOER

Suid-Afrika is tans ’n netto-uitvoerder van suiwel. Die uitvoermark bied uitstekende geleenthede, maar daarvoor is topgeriewe nodig, wat duur is, sê Vorster.

“Die land het nog nie sulke ge- nie, maar werk saam met die Regering daaraan.” Suid-Afrikaanse melkkopers sukkel om met EU-verwerkers mee te ding weens landbousubsidies daar.

Clover verstaan boere se behoefte aan ’n seisoenale kalfpatroon vir bedryfsdoeltreffendheid en marges. “Ons moet eerder die verwerkingsaanlegte by die melkvloei aanpas as om boere te vra om hul melkvloei by die aanlegte aan te pas,” sê hy.

Vorster was baie gelukkig met die maatskappy se groter doeltreffendheid en kostevermindering in ’n uitdagende mark.

“Senior bestuurders het ingestem tot vrywillige salarisvaspenning met geen verhogings in die huidige boekjaar nie ten einde koste in toom te hou.”

‘Senior bestuurders het ingestem tot ’n vrywillige salarisvaspenning met geen verhogings in die huidige boekjaar nie.’