GOEDKOOP LENINGS KOM JOU DALK DUUR TE STAAN
BOERDERYSAKE waarin ’n grondeienaar ’n plaas (of ander bates) deur middel van ’n rentevrye lening aan ’n trust verkoop het, kan van aanstaande jaar af aansienlik swaarder belas word.
Dit is weens die voorgestelde artikel 7C van die Inkomstebelastingwet, wat mag ingebring word om ’n stokkie te steek voor die gebruik van trustfondse om boedelbelasting te ontduik.
Dié artikel, wat moontlik nuut by die Inkomstebelastingwet ingevoeg gaan word, het betrekking op alle lenings wat tussen ’n trust en persone of maatskappye verbonde aan die trust aangegaan word.
Kragtens dié artikel wil die Suid-Afrikaanse Inkomstediens onder meer jaarliks ’n “geagte” rentebedrag belas, wat bereken sal word as die verskil tussen die amptelike rentekoers en die rentekoers waarteen die lening tussen die grondeienaar en die trust gehef is.
Die Parlement se staande komitee oor finansies moet nog oor die voorgenome wysigings beraadslaag en ook kommentare op dié wysigings deurwerk. Daar word verwag dat die wysigings op 1 Maart aanstaande jaar in werking sal tree.
NEUTRALISEER
Adv. Ronald King, hoof van strategiese navorsing by PSG, verduidelik dat bykomende belasting gehef kan word op boedeleienaars wat plase deur middel van ’n lening onder die 8% markkoers aan ’n trust verkoop het. Dié reëling geld egter nie waar die trust geld aan ’n bank skuld nie.
“As jy die plaas aan die trust teen ’n rentevrye lening verkoop het, gaan die geagte rente nou vereis dat die plaas se waarde in die trust met meer as 16,4% per jaar moet toeneem sodat die boedelbelastingvoordele die inkomstebelastingnadele kan ewenaar,” sê King.
’n Bykomende angel in dié wetgewing is dat die bykomende belasting wat van die boedeleienaar geëis word, binne drie jaar van die trust verhaal moet word, anders sal hierdie bedrag as ’n skenking gesien en teen 20% belas word.
VOORDELE
Dié nuwe belastingreëling ontneem egter nie boerderye van die beskermingswaarde wat trusts aan hul besighede bied nie. Só kan plase in trust steeds van een geslag na ’n volgende oorgedra word sonder dat dit gevries word wanneer ’n familielid sterf. Waar ’n boer weens, byvoorbeeld, droogte bankrot speel, dien ’n trust ook steeds sy doel deur die grond apart te hou van bates wat gelikwideer kan word, en bly die grond dus in die familie se hande.
Só kan plase in trust steeds van een geslag na ’n volgende oorgedra word sonder dat dit gevries word wanneer ’n familielid sterf.