SUIDER-AFRIKA ONTVANG GEREKENDE BESOEKER
Breedplan bestee jaarliks sowat R10 miljoen aan navorsing om sagteware te ontwikkel wat gevorderde seleksie en teling moontlik maak.
“Al hoe meer mense verkry toegang tot die internet en telers kan dag en nag teelwaardes en ander inligting oor vee wêreldwyd ondersoek. Sowat 3 miljoen mense gebruik maandeliks ons internetdienste,” sê dr. Hugh Nivison. Hy is die nuwe besturende direkteur van die navorsingseenheid vir landboubesigheid (ABRI/Breedplan) aan die Universiteit van New England in Armidale, Nieu-Suid-Wallis, Australië.
Hy het Suid-Afrika en Namibië saam met dr. Michael Bradfield, hoof van Breedplan in Suider-Afrika, besoek. Nivison sê dié navorsing word met die samewerking van die eenheid vir dieregenetika en -teling (AGBU) se navorsingseenheid gedoen, wat hom toespits op die navorsing van produksiekenmerke van vleisbeeste en kleinvee.
Hy het ook met ’n afgevaardigde van Zimbabwe gesels om klante te ontmoet as deel van ’n wêreldwye besoek aan telersgenootskappe in lande wat Breedplan se dienste gebruik vir die registrasie van teeldiere en die ontleding van teelwaardes vir gevorderde seleksie en teling. Breedplan lewer reeds dienste aan 175 genootskappe in 20 lande in Noord- en Suid-Amerika, Europa, Afrika en Australasië. In Suid-Afrika word ongeveer 40% van die registrasies van vleisbeestelersgenootskappe deur Breedplan gedoen. In baie ander lande word melkbeeste, skape, bokke en perde ook ingesluit.
Nivison, ’n veearts, boer self met sowat 8 000 Merino’s en Border Leicester-Merinokruisskape en 800 Angusbeeste en Black Baldies (Angus-Hereford-kruisings) by Armidale. — CHARL VAN ROOYEN