SKAAPJASSE SLAAG DIE TOETS
In 2001 het mnr. Giepie Calldo, nasionale bestuurder van woltegniese dienste by CMW, begin om vir sy skape jasse aan te trek. Sedertdien het hy sy eie proewe met die jassies gedoen en heelwat verbeterings aangebring. Dié bestuurspraktyk bring hom onder meer ’n bykomende meer as 20% in die sak wanneer sy wol met ’n skoonopbrengs van tot 79,8% verkoop word.
Volgens Giepie is die nasionale gemiddelde skoonopbrengs 62% vir alle klasse wol. In uitsonderlike jare is die skoonopbrengs van die Suid-Vrystaatse wol per geleentheid 78%, maar sy wolproduksie was oor die afgelope dekade nog nie laer as 76,5% nie. “Oor die leeftyd van ’n jas-skaap verdien ek rofweg 20% meer per skeersel as ander boere,” sê hy.
Die feit dat Giepie die af- gelope dekade nie een skaap verloor het weens koue in ’n gebied, soos die Suid-Vrystaat wat berug is vir sy lae temperature, is volgens hom die grootste bewys van die skaapjassies se sukses.
Die meeste vrektes kom net ná skeertyd voor as gevolg van reën en die koue wind net daarna. Omdat skape deur die jassies beskerm word, is die gewigsverlies minimaal. Skape kan net nadat hulle geskeer is tot 4 kg aan gewig verloor omdat die temperatuur in baie gevalle tot -8 °C snags kan daal.
Ooie met jasse verbruik geen energie om warm te bly nie en gebruik ál die voedingstowwe vir die nodige reproduksie en produksie.
As die toestande ná skeertyd gestabiliseer is, kan die jassies verwyder word. Giepie se skape dra egter regdeur die jaar hul jassies.
Die jassies help in sy geval ook nog as teenvoeter vir probleemdiere. Jakkalse en rooikatte word na hul natuurlike prooi toe gedwing deur onder meer reukmiddels wat op die jassies gespuit kan word wanneer die skape gekraal word.
Giepie het ook klein jassies uit afvalmateriaal laat maak vir jong lammers. Sommige boere gebruik die skaapjasse ook om kalwers en bokke te beskerm.
’n Skaapboer se plan om jasse vir sy skape aan te trek, is vanjaar 12 jaar oud. Dit is beproef en het bewys skaapvrektes weens die koue kan voorkom, wol skoongehou en probleemdiere só afgeweer word.