‘GROOT MENERE’ ÉN MIDDELSLAGWERKTUIE VERTOON
Groepe boere bekyk Case IH se Patriot 3230-hoogloopspuit. Die Patriot-reeks sluit in die SPX 3240 Advance en die 3340- en 4440-modelle. Outomatiese beheer oor hul spuitbalke verseker egalige toediening van onkruiddoder oor elke plant en verhoed oorslaan-kolle. Die internasionale trekker-en-werktuigvervaardiger lê ook groot klem op die duursaamheid van sy Patriot-spuite en hul gemaklike kajuite met wye uitsig. Luidens die katalogus word die heel eerste Patriot wat hulle gebou het, steeds gebruik. Die spuitbalk-lengtes wissel van 18,3 meter tot ’n massiewe 36,5 meter, en tenkvermoë van 3 028 liter (op die 3230-model) tot 4 542 liter (op die 4430-model). Die CASE IH 7140-stroper is deel van die vervaardiger se Axial Flowreeks. Die nuwe 140-reeks is gemik op middelslagboerderye. Verbeterings aan die nuwe modelle sluit in verhoogde perdekrag en ’n beter rotor-ontwerp. Van links is mnre. Arno du Plessis, nasionale verkoopsbestuurder vir Case IH, Jacques Coetzee, produkbestuurder vir Case IH by Northmec, die plaaslike verspreider, Jaap van der Westhuizen, Kobus Olwagen, ook Case IH-produkbestuurder, en Anton Stander, Case IH-produkspesialis. Die Ecolo Tiger 870, ’n kombinasie-kontrasnyeg met skeurploeg, is een van die nuwe werktuie vir grondbewerking. Dié masjien skep ’n hoë-opbrengsomgewing vir plante en skakel grondverdigting uit, terwyl oesreste in die grond ingewerk word en voedingstowwe sodoende in die grond vasgelê word. Die masjien is tot 8 m wyd en is dus een van die wydste kombinasie-kontrasnyeg met skeurploeë in die bedryf.
Die internasionale trekkervervaardiger Case IH het sy demonstrasie-dag op die plaas Cairo van die graan-en-oliesaadboer mnr. Jaap van der Westhuizen gehou.
agenis@landbou.com