Leer meer oor koei se waarde
’ N KOEI se belangrike rol in ’n vleisbeeskudde word soms ten koste van die bul onderskat. Haar vermoë om elke jaar ’n gesonde kalf te produseer, maak egter minstens die helfte van die ekonomiese waarde van só ’n boerdery uit.
Daarom gaan vanjaar se vleisbeesskool, wat van 14 tot 16 Oktober deur Landbouweekblad, Breedplan en die Lewendehawe Registrerende Owerheid (LRF) by Aldam in die Vrystaat aangebied word, ook sterk klem lê op vroulike diere.
Reproduksie is een afdeling van die skool se tema, terwyl die ander oor vleis handel.
REPRODUKSIE
Dr. Michael Bradfield, hoof van Breedplan in Suider- Afrika, sê die gesaghebbende sprekers wat oor reproduksie gaan praat, is prof. Michiel Scholtz, ’n spesialis-dierenavorser by die Landbounavorsingsraad (LNR), dr. Dietmar Holm, assosiaat-professor en veeartsenykundige spesialis van die Universiteit van Pretoria, dr. Bob Weaber van die Colorado- universiteit in Amerika en mnr. Christian Duff, ’n veeproduksiekenner van Austra- lië wat op ’n tegniese vlak met boere saamwerk.
VLEIS
Die tweede tema, vleis, sal onder leiding van dr. Phillip Strydom, navorsingsleier in vleiskunde by die LNR se Diereproduksie-instituut, aangebied word. Hy en sy span gaan die boere leer hoe om tussen die verskillende grade van vleissagtheid en smaaklikheid te onderskei. Die deelnemers sal daarna vleis in ’n toets moet proe. – CHARL VAN ROOYEN