NUWE REGULASIES HUPSTOOT VIR VISBOERDERY

Veranderinge aan omgewingsregulasies vir die akwakultuurbedryf help om die regulering en burokratiese vereistes vir dié soort projekte effens te verslap.

Mnr. Etienne Hinrichsen, ’n bedryfskonsultant, meen die veranderings is gering, maar baie betekenisvol vir die vooruitgang van die bedryf in sy geheel. Dit is sedert 8 Desember van krag en op omgewingsimpak-evaluering (OIE) van toepassing.

Boerderye wat meer as 20 ton vis per jaar produseer, kan nou met net ’n eenvoudige OIE om goedkeuring aansoek doen.

Kragtens die vorige regulasies was akwakultuur die enigste diereproduksiebedryf wat nog aan ’n volledige bestekopname en omgewingsimpakstudie onderworpe was, sê Etienne. Ander diereproduksie-projekte moes slegs ’n eenvoudige OIE doen.

Hy verduidelik dat die aangepaste regulasies die koste en tyd sal verminder om nuwe akwakultuurondernemings op die been te bring. Dit behoort die bedryf aantrekliker vir nuwe toetreders te maak.

Dit sal nogtans merendeels tot voordeel van die groot ondernemings wees en klein en opkomende boere nog nie veel help nie.

Etienne sê dit is onwaarskynlik dat kleiner visboere onvoorsiene skade aan die omgewing sal aanrig gegewe die skaal van akwakultuur in Suid-Afrika.

“Openbare deelname is steeds ’n komponent van die eenvoudige OIE, en die omgewingsowerhede behou steeds die reg voor om ’n vollediger omgewingsimpakstudie vir projekte in sensitiewe gebiede te vereis.

“Alle projekte in ’n sensitiewe ekostelsel, ongeag die skaal, het nog altyd ’n OIE nodig gehad. Dit bly ingevolge die nuwe regulasies die geval.

“Die fout wat mense maak, is om aan te neem hulle is van alle goedkeuring ingevolge ander wette, soos die water- en biodiversiteit- wette, gevrywaar as hulle ’ n projek van minder as 20 ton per jaar bedryf. Dit is nie die geval nie. Hulle kán kragtens daardie ander wetgewing verantwoordelik gehou word,” waarsku Etienne. – JOHAN VAN DER MERWE