BESTE TEGNOLOGIE VAN ISRAEL HIER TE SIEN
ISRAEL, wat weens skaars natuurlike hulpbronne gedwing word om nuwe metodes, tegnologie en produkte te ontwikkel, speel in April gasheer vir die 19de Agritech- ekspo, ’ n belangrike toonvenster vir internasionale landboutegnologie.
Die ekspo sal veral oor na-oespraktyke handel. Israel word as wêreldleier in die veld van landboutegnologie beskou en Agritech, wat elke drie jaar plaasvind, bied ’n blik op dié interessante bedryf. Daar sal honderde voorbeelde van Israeliese tegnologie te sien wees wat onder meer met kweekhuise, besproeiing, waterbestuur en melkboerdery te doen het.
“Israel se strewe om meer te produseer met minder hulpbronne het gelei tot ’n kleiner arbeidsmag. Ons gebruik minder grond en meer as die helfte minder water, maar ons produseer drie tot vier keer meer kos. Hoe doen ons dit? Met tegnologie, natuurlik. Ons moet nuwe hulpbronne en tegnologie ontwikkel,” het mnr. Gilad Peled van die land se Uitvoerinstituut oor dié klein, waterarm landjie in die Midde-Ooste aan ’n groep internasionale joernaliste gesê.
Volgens me. Dani Meiri, hoofbestuurder van Agritech NPO, is daar verreikende ekonomiese en klimaatsveranderinge in die landboubedryf wat ’n invloed op gewasproduksie en die waarde van ’n oes het.
“Dit noodsaak ons om in na-oesstelsels te belê. Dié stelsels is nogal uiteenlopend. Ons wil ’n platform skep om daardie metodes en prosesse ten toon te stel. Ons gaan op die ekspo meer uitstallers hê wat in na-oes en voedselverwerking spesialiseer. Ons bied ook ’n konferensie met internasionale sprekers en werksessies daaroor aan.”
Agritech 2015 vind van 28 tot 30 April by die handelskou-enkonvensiesentrum in Tel Aviv plaas. Vir nog inligting besoek