MASALA-VISKOEKIES MET SUURLEMOENMAYONNAISE
Ek het die resep vir hierdie viskoekies jare gelede in ’n Maleise restaurant by die sjef afgebedel en dit toe ’n bietjie vereenvoudig. Dis regtig lekker en het hope geur. Die span in die Boerekos- ateljee het die viskoekies en smullekker sous verslind ná die fotosessie. Maak dit sommer vanaand vir aandete – jou huismense sal almal ’n tweede porsie vra!
Masala-viskoekies 500 g gaar stokvis, grate verwyder en fyn gevlok 1 geskilde, gaar aartappel, fyn gedruk 45 ml fyngekapte, vars koljanderblare (gebruik pietersielie as jy nie koljander het nie) Sap en fyngerasperde skil van 1 klein suurlemoen Sout en vars gemaalde swartpeper na smaak 1 ui, gerasper 5-10 ml seekosmasala 15 ml botter 2 eiergele 250 ml vars broodkrummels Ongeveer 90 ml room
Suurlemoenmayonnaise 100 ml dik mayonnaise van ’n goeie gehalte 100 ml dik, natuurlike jogurt Sap en gerasperde skil van 1 klein suurlemoen Sout en vars gemaalde swartpeper na smaak 10 ml kappertjiesaad, grof gekap Knippie suiker
Meng die stokvis, aartappel, kruie en suurlemoensap en -skil saam, geur met sout en peper en hou eenkant. Braai die ui en seekosmasala oor lae hitte in die botter tot die ui gaar is. Laat effens afkoel en roer dan die eiergele, broodkrummels en room by. Laat staan vir 5 minute en voeg by die vismengsel. Meng goed. Verkoel die mengsel vir minstens 1 uur. Vorm die viskoekies en braai in ’n bietjie olie oor matige hitte tot goudbruin en bros aan albei kante en deurwarm. Vir die mayonnaise: Meng ál die bestanddele saam, bedek en verkoel vir 20 minute voor jy dit voorsit. Sit die viskoekies voor met die mayonnaise, aartappelskyfies en dun gesnyde agurkies. Lewer ongeveer 10 viskoekies (5 porsies).