BAKKERSVLATERT MET TOFFIEDRUIWE
’n Fees van teksture en geure. Die romerige bakkersvla, soet broskors en krakerige toffie om die sappige korrels vorm saam die perfekte nagereg.
Kors 375 ml koekmeel 45 ml strooisuiker 2 ml sout 125 g koue botter, in blokkies gesny
Bakkersvla 6 eiergele 100 ml suiker 30 ml elk mielieblom en koekmeel 560 ml melk
5 ml goeie vanielje-ekstrak
Toffiedruiwe 500 ml pitlose druiwekorrels, middeldeur gesny 125 ml suiker Spatsel water Spatsel suurlemoensap Voorverhit die oond tot 200 º C. Maak eers die kors: Verwerk ál die bestanddele saam in ’n voedselverwerker tot ’n deeg vorm. Voeg ’n paar druppels yswater by indien die mengsel te droog is. Smeer ’n losboomtertpan van 20 cm met ’n klein bietjie gesmelte botter of bespuit met kleefwerende kossproei. Druk die deeg eweredig teen die kante en op die boom van die pan vas. Bak die kors vir ongeveer 25 minute tot dit goudbruin en gaar is. Haal uit die oond en laat afkoel. Vir die bakkersvla: Klits die eiergele en suiker goed tot liggeel. Klits die mielieblom en meel by. Verhit die melk tot net onder kookpunt. Voeg die helfte van die warm melk by die eiermengsel en roer tot goed gemeng. Giet alles terug in die kastrol. Verhit tot kookpunt terwyl jy aanhoudend met ’n draadklitser roer. Klits vinnig sodra die vla verdik en begin prut om te keer dat dit aanbrand. Laat prut vir drie tot vyf minute terwyl jy vinnig klits, en verwyder van die hitte. Klits die vanielje-ekstrak by en bedek met kleefplastiek. Druk dit af tot op die vla om te keer dat ’n vel bo-op vorm. Laat tot kamertemperatuur afkoel. Klits die afgekoelde vla tot glad en skep dit in die gaar tertkors. Smeer gelyk. Pak die deurgesnyde druiwekorrels bo-op. Verhit die suiker, water en suurlemoensap stadig oor lae hitte tot die suiker gesmelt is. Verhit tot kookpunt en kook vinnig tot die suiker ’n karamelkleur het. Verwyder van die hitte en drup ’n bietjie karamel oor die druiwe. Laat staan tot ’n harde lagie gevorm het. Lewer 10 porsies.
WENK: Tuisgemaakte broskors-, blaar- en skilferkorsdeeg vries goed. Rol eers die deeg dunner uit (in ’n reghoekige vorm) op ’n meelbestrooide oppervlak of op ’n vel wasof bakpapier. Rol die deeg dan in ’n rolletjie op, draai goed toe in kleefplastiek en pak dit in ’n geskikte bak. Vries vir tot 3 maande. Ontdooi deeg in die yskas. Moet dit nooit in die mikrogolf probeer ontdooi nie.