Ukukhuluma ngokuhlukumezeka kumelaphile owozalo
UKUKHULUMA ngokudlwengulwa eneminyaka emine ngemuva kwezinyanga ezine kufihlwe unina, kumenze walapheka emoyeni uthobeka Ndwandwe (28) osengumlingisi wozalo.
Uthobeka ungomunye wabalingisi abasha balo mdlalo abaqale ukubonakala kule nyanga.
Ungena kuzalo ngemuva kokuqeqeshwa esikhungweni samaciko, Ikabawo Performing Art Academy esethekwini.
Ekhuluma nesolezwe uthobeka, uveze ukuthi umusa kankulunkulu ombeke la ekhona njengoba impilo ingabanga lula esakhula.
“Ukushona kukamama ngenxa yomdlavuza webele ngase ngisala nesinye sezihlobo esangidlwengula, akungenzanga ngakhula ngizivalele ngizwa ubuhlungu kodwa kunalokho, ngathi uma konke lokhu kungenzekanga kimi bekuzokwenzeka kubani.
“Yilapho engakhetha khona ukusukuma ngizithathe ukuze ngifeze amaphupho ami. Ngingene emkhakheni wokuba iciko ngemuva kokuthi ngifundele ukuba umshayeli wamabhanoyi kodwa kwangalunga kulowo mkhakha.
“Abantu bangitshela ukuthi nginekhono lokucula, lokusakaza nokulingisa. U-anti wami wangitshela ngesikhungo Ikabawo, ngizihlalele emakhaya emtubatuba, ngempela ngazama ukuxhumana nabo bathi angifike ngizokwenza inhlolokhono, ngakwenza lokho, ngangena ngaqeqeshwa ngo2020,” kusho uthobeka.
Uthe ungomunye wabafundi abaqeqeshwe abaphathi balesi sikhungo usabelo Ngema, Thandeka Zulu nomalishe ngaphambi kokuthi adlule emhlabeni.
“Ngibonga uqeqesho abasinike lona. Manje sifeza amaphupho ethu njengoba sengilingisa kuzalo.
Ngilingisa indawo ka-olwethu okuyintombazane eneminyaka engu-17, enekhono lokucula.
“U-olwethu unekhono elimangalisayo, uhlakaniphile kodwa kulo mdlalo usohambweni lokuhlaselwa ngamadimoni esikoleni. Ngicabanga ukuthi le ndawo izofundisa intsha esesikoleni ukuthi noma bangahlangabezana naziphi izimo kodwa bangalinge bacabange ukuzikhunga,” kuchaza yena.
Uthe okumjabulisayo ukuthi ubezitshela ukuthi uzobonakala amasonto ambalwa kulo mdlalo kodwa muva nje uthole ukuthi uzohlala isizini yeshumi yonke.