Okwenziwa wumbalula kuzodala uqhekeko eqenjini lakhe elinezinkinga
MHLELI: Kubukeka sengathi lukhulu luza luyanyelela ekuphatheni amandla okubusa. Sengathi izwe lizobuswa abantu abasha njengoba mihla yonke belokhu bekhala ngokuthi kuvimbe amakhehla nezalukazi ephalamende.
Izimpawu zalokho seziqalile ukubonakala ngamafu akhombisa ukuthi akusekudala sizwe liduma liqeqebula abaningi abazobe bengalindele.
Okuyizimpawu zalokhu yindlela unobhala jikelele WE-ANC, umnuz Fikile Mbalula, (osesithombeni) azibona engakhuluma noma kanjani ngokufisa kwakhe okukhombisa ukuthi usekhohliwe ukuthi isikhundla asiphethe ukusona ngokukhethwa ngamalungu eqembu lakhe akusona isikhundla sokuzalwa.
Besiqala ngqa ukuzwa kuhlanjalazwa omunye ungqongqoshe upravin Gordhan emsabisa ngokuthi izinyawo zizogcwala udaka emnyangweni awuphethe. Sizokhumbula ukuthi usabise nangene emva kwakhe kulesi sikhundla okungumnuz Gwede Mantashe. Sengathi lukhulu luyeza, kuncane kulokhu esikubonayo.
Okuqaphelekayo ukuthi ngisho nomengameli bezwe abasuke bekuhulumeni abamhlambalazi ungqongqoshe osuke mhlawumbe umehlula umnyango kodwa bavele bamgudluze noma bamshintshele komunye umnyango.
Okuxakayo wukuthi umbalula ungenaphi ekusebenzeni kwabasephalamende ngoba yena ujutshelwe ekomkhulu leqembu okuyishell
House. Sengathi udinga ukuqeqeshwa kucace ukuthi ngokwesikhundla sakhe kumele asebenze agcine kuphi angangeni ezintweni ezingamdingi.
Akwenzayo ngiyethemba ukuthi nabamvotela sebeyabona ukuthi bazijoja ngolumabhaxa. Okumele akukhumbule ukuthi lesi sikhundla asiphethe asimenzi undlovukayiphikiswa kodwa uphethe into yabantu. Sengathi kumele ehlise isivinini asehamba ngaso ngoba uzodala uqhekeko eqenjini lakhe elivele linezinkinga zezinkambu.
Sipho Robert Mpungose
ESHOWE