‘Izitshudeni zikhwabanisa imali bese ziyohlala emijondolo’
PHEZU kokuba isikhwama esixhasa izitshudeni ngemali yokufunda ezikhungweni zemfundo ephakeme, iNational Students’ Financial Aid Scheme (NSFAS) sikhipha ngaphezu kukaR11 billion wezindawo zokuhlala izitshudeni kodwa kukhona ezihlala emijondolo bese zithatha imali esalayo ziyisebenzisele ezinye izinto.
Lokhu kuvele engqungqutheleni ehlelwe yisikhwama ebheka indaba yezindawo zokuhlala ezikhungweni eCentral University of Technology eFree State.
Sekuphenduke insakavukela ukuthi minyaka yonke izitshudeni ziyateleka ezikhungweni zemfundo ezehlukene, zikhala ngendawo yokuhlala.
IPhini likaNgqongqoshe weMfundo ePhakeme, uMnuz Buti Manamela, likhale ngokuthi izitshudeni zinikwa imali yokuthi zikhokhele izindawo zokuhlala, bese zona zikhokhela indawo ebiza kancane.
Uthe zibe sezithatha ingxenye yemali enkulu ziyohlala emijondolo.
“Kuyasikhathaza ukuthi izitshudeni zihlala ezindaweni ezingekho esimeni ekubeni imali siyikhiphile. Imali yeNSFAS eyokukhokhela izidingo zokufunda nokufundisa, hhayi okunye.”
Isikhulu esiphezulu seNSFAS, uMnuz Andile Nongogo, sithe iphutha abalenza wukunika izitshudeni imali engukheshi.
Sithe abafuni ukuthi izitshudeni zihlale endaweni engekho ezingeni.
“Ezinye izitshudeni ziqasha emalokishini. Siyazi sonke ukuthi uma ungahlali kulelo lokishi kulula ukubona umuntu osuke efike ngoba ezoqasha. Yingakho sithi kumele sikhokhele into esezingeni lokuhlala izitshudeni.”
Umengameli weSasco obuye abe yilungu lebhodi leNSFAS, uBamanye Matiwane, uthe kumele kuze kube neziteleka ezikhungweni ukuze kulungiswe indaba yezindawo zokuhlala.
Uthe ezinye zezitshudeni zihlala ezindaweni ezingakulungele ukuthi zingakwazi ukufundela kuzona.
“Kuyadingeka ukuthi ziphuculwe izindawo ezihlala izitshudeni ukuze zikwazi ukuphasa kalula.”
UNgqongqoshe weMfundo ePhakeme, uDkt Blade Nzimande, uthe uthola izikhalo zezitshudeni ezikhala ngezinkinga zabaqashi ezindaweni ezihlala kuzona.
Uthe zisuke zikhala ngendlela ezikhishwa ngayo, wathi okunye ngukuthi kumele bakhokhe imali eyodwa yezindawo zokuhlala. “Izitshudeni zikhala ngezindawo ezingekho ezingeni ezihlala kuzona, ezisuke ziqashwe yizikhungo. Sikhokha cishe uR11.9 billion ngonyaka wezindawo zokuhlala izitshudeni. Iyahluka imali ekhokhelwa izikhungo ngezindawo zokuhlala, ezinye emakolishi zibiza kusuka kuR33 000 kuya kuR41 000 ngonyaka.”
UDkt Nkosinathi Sishi, uMqondisi jikelele emnyangweni, uthe emanyuesi izindawo zokuhlala zibiza kusuka kuR16
000 ngonyaka zize zifinyelele kuR68 000.
Uthe kuyadingeka ukuthi ifane imali ezokhokhwa ezindaweni zokuhlala.