IChippa United nomnqamulajuqu wokukhokhela umdlali
ZIYANDA izinkinga zeChippa United osekuvele ukuthi izobanjelwa imali esibonelelweni esitholwa nyanga zonke ngamaqembu adlala kwiDStv Premiership.
UCalvin Motloung, oyiphini likanobhala jikelele weSouth African Football Players Union (Safpu), utshele Isolezwe ukuthi ezakamuva zithi leli qembu likaSiviwe "Chippa" Mpengesi likweleta uTsietsi Khooa (30) emuva kokuxoshwa kuleli qembu
Ngokusho kwalesi sikhulu, iChippa, ezinze eGqeberha, Eastern Cape, kuzomele ikhokhele lo mdlali izinyanga ezintathu isamba semali angasidalulanga.
Wakhonjwa indlela ngoFebhuwari.
UMotloung uveze ukuthi ngoLwesithathu olwedlule iDispute Resolution Committee (DRC) ilahle iChippa ngecala lokukweleta lo mdlali. Ize yalinqumela ogodweni ukuthi izolutheza olunenkume uma ike yangamkhokhela ezinsukwini eziyisikhombisa ezizayo.
"IChippa isidlale ngoTsietsi isikhathi eside, siyajabula ukuthi iPSL igcine ikubonile lokho ebesikufisa. Amaqembu awayeke ukudlala ngabafana.
“Into ebesiyicelile kwiDRC ngoba bese kuphele isikhathi eside iChippa ingakhokhi wukuthi uma kuphela izinsuku eziyisikhombisa ihluleka ukukhokha le mali ibanjwe esiboneleweni sayo sanyanga zonke abasithola kwiPSL.
“Manje sisemizameni yokuvula amagatsha iNingizimu Afrika yonke. Kuliphutha ukuthi besinegatsha ebelizinze eGoli kuphela.
“Maduze sizosabalala kulona lonke elakuleli. Noma ngingeke ngiveze okuningi kodwa kusazowashubela amaqembu adlala ngamalungu ethu. Uphi kanti umsebenzi wethu uma singeke sibalwele abadlali? Sihlela ukuthi kuzo zonke izifundazwe sivule amahhovisi. Sifuna ukuthi izinkinga zabadlali zisheshe zisukunyelwe,” kusho uMotloung.
UMorgan Mammila, okhulumela amaChilli Boys, uthe: "Angifuni ukuqamba amanga, ngiyazifikela kuleli qembu, lezi zindaba ongitshela ngazo angizazi. Mina ngazi ukuthi siyabakhokhela abadlali bethu ngisho nalabo okwenzeka ngesimo okhuluma ngaso.“
AmaChilli Boys abhekana nale nkinga nje, kuvele akuwahambeli kahle nasemidlalweni yeligi. Asendaweni ka-13 ngamaphuzu amahlanu. Asanqobe umdlalo owodwa kweyisithupha.
Kodlule adlale ngokulingana neSuperSport United. NgoMgqibelo azovakashela iKaizer Chiefs eFNB Stadium, eGoli.