I-DA iziveza ubuyona ngenxa yamaphutha kaKhongolose
MHLELI: Ngenkulu inhlonipho nokuzithoba ngicela ukuveza uvo lwami ngesikhangiso seqembu iDA esesisuse umsindo esithi: “I-ANC inibiza ngabacwasa ngobuhlanga kepha iDA inibiza ngamaqhawe.”
Lesi sikhangiso seDA sivusa uhlevane siphinde siphehle udlame kwazise izinkukhu bezingakehli emthini kusuke udungunyane lwasePhoenix. Sisazama ukuzikhotha amanxeba kepha uma kukhona amaqembu azohlulwa yipolitiki asithunuke amanxeba kuzochitheka gula linamasi. Abahleli balesi sikhangiso kubonakala ngokusobala ukuthi babhebhezela udlame ikakhulukazi esifundazweni iKwaZulu-Natal kwazise kujwayelekile ukuthi isimo sibe manzonzo uma sesibheke okhethweni.
Nakuba kubukeka singamukelekile isikhangiso kodwa kukhona okunye okudidayo ngenhloso yaso njengoba sazi ukuthi iDA ize izijube ifolose ngomuntu omnyama emkhankasweni wayo wokhetho ngenhloso yokuzuza ivoti lomuntu omnyama.
Ngisho ngabe iDA ikhetha amaNdiya ngempi yayo yobuhlanga kepha akubonakali kuzoyizuzisa lokho ekugayeni ivoti kwazise kubonakala liliningi elizolahleka lomuntu omnyama. Sonke lesi simo sisho ukuthi iDA inenzondo enkulu ebheke kumuntu omnyama.
Ngakolunye uhlangothi i-ANC ifunda isifundo njengoba yanxenxa wonke umuntu omnyama ukuthi akhe uxolo nomlungu yize engaxolisanga. Kuzokhumbuleka ukuthi abantu abamnyama bashintsha ngisho amaholidi abo akhethekile njengoSuku lukaShaka nolukaDingane, kwafakwa isilungu esingachazi ngisho ukubaluleka kwala makhosi. Isifundo esisifunda namuhla ukuthi ungamxoleli umuntu ongalucelile uxolo kwazise ukungaluceli kwakhe kusho ukuthi akaludingi. Wonke lo monakalo wenziwe iyona i-ANC njengeqembu elibusayo ngakho-ke ayibhukule ibhule lo mlilo usesemafusini.
Kuyaqapheleka ukuthi i-ANC isaqhubeka nalokhu njengoba isiphinde yaphakamisa ukuthi iSilo asisezohlonishwa ngendesheni njengenhlalayenza uma kuvulwa isiShayamthetho saKwaZuluNatal. Nalapho i-ANC isaqhubeka nokubukela phansi isizwe samaZulu. Okudida kakhulu ukuthi kungani kuvumbuke uqhekeko endlunkulu qede sitshelwe ngalesi sinqumo. Ngicela lolu daba silubheke nhlangothi zonke kwazise iphutha leDA lisivezela amaphutha amaningi e-ANC.
Phondolwendlovu Mzolo
KWANYAVU