Bahlaliswe lubhojozi yizigebengu eWaterloo
ASESABA ukuphuma ezindlini ahambe emigwaqweni amalungu omphakathi waseWaterloo, ngaseVerulam, akhala ngokuhlaliswa lubhojozi yizinswelaboya ezibamba inkunzi, zigqekeze imizi, zithumbe abantu kokunye zibadubule zibabulale.
Muva nje, kubanjwe inkunzi iphoyisa likaMasipala weTheku, endaweni edayisa inyama, laphucwa isibhamu nesikhwama semali.
Abamele umphakathi bahlangane nobuholi bamaphoyisa esiteshini saseVerulam, ngoLwesihlanu emini bahambisa uhlu lwezikhalo.
Abahlali banengwa ukwanda kwezigameko zobugebengu ngesivinini esethusayo iningi lazo ezenzeka emini kwabha kubuka nezingane.
Bathi abasasabi amaphara kuphela kodwa sebesaba nanoma iyiphi imoto ehamba abantu abangaziwa endaweni. Kuthiwa imoto ivele ime eduze kwakho emgwaqweni kwehle abantu bakudumele.
Omunye wezakhamuzi saseWaterloo obengumholi wemashi, uNksz Kholeka Mtolo, uthe inkunzi ibanjwa phakathi etekisini, izigebengu ezizenza abagibeli.
“Sesisaba izimoto ngoba asazi ukuthi iyona yiphi ezokubamba inkunzi ngoba ayiyodwa, ziningi ziyashintshana. Abasebenzi abahamba ngamatekisi bathi kugibela abafana abane bazenze abagibeli abakhipha ucwazi baphuce abantu imali, izikhwama, ama-weave behle bangene emotweni bahambe,” kusho uNksz Mtolo.
Abebemasha bakhala ngokungabonakali kwamaphoyisa azulazula eWaterloo, eqaphe ubugebengu. Bathi isiteshi sibatshela ukuthi sishodelwa amaphoyisa nezimoto uma bebika ngobugebengu.
Lokhu kubangelwa ukuthi lesi siteshi sibhekelele imiphakathi eminingi kakhulu eyakhele iVerulam namaphethelo.
Umphakathi uthe okungenani akufakwe isiteshi esingumahamba nendlwana eWaterloo futhi amaphoyisa abonakale endaweni.
Bathe ngemashi bebedonsa amehlo kaKhomishana wamaPhoyisa KwaZulu-Natal, uLieutenant General Nhlanhla Mkhwanazi noNgqongqoshe wamaPhoyisa uMnuz Bheki Cele, ukuba bangenelele.
Osigaxamabhande abangaphathi balesi siteshi bathathe incwadi enohlu lwezikhalo bathembisa ukuthi bazoyidlulisela ebuholini bamaphoyisa esifundeni saseThekwini.