Asingafunzwa into esiyibonayo ukuthi ayilungile
MHLELI: Ngicela ukuphendula uSakhile Msweli, obhale kwelangoLwesithathu ethi
Nongalo, musa ukusikhohlisa sibadala. Akukho manzi ezindaweni zasemakhaya KwaZulu-Natal, sidonsa kanzima kuze kube ngcono emadolobheni.
Ugesi sinawo kodwa siyefana nabangenawo ngoba uhamba noma yinini. Akufani nowasedolobheni futhi emakhaya asitshelwa noma uzohamba, sibona usuhambile.
Kuzoba imigwaqo KwesaKwaMthethwa, ungafunga ukuthi kuhamba izimbongolo nezinkabi, wagcina ukulungiswa nguShenge (uMntwana waKwaPhindangene) esaphethe iKwaZuluNatal.
Okunye engithanda ukukuqondisa ngenkulumo yakho Nongalo wukuthi i-ANC ayinamali, ekwenzayo ikwenza ngemali yethu bakhokhi bentela. Ngikuzwe ubala izinto ezine okungamanzi, ugesi, imfundo yamahhala nezindlu zomxhaso. Mfo kaNongalo eminyakeni ewu-27, kuphethe i-ANC, wena usabone lezi zinto ezine ozibalile? Kusho ukuthi kusamele iqhubeke eminye iminyaka ewu-27 ukuze isenzele lezi zinto ozibalile?
Kungani Nongalo ungayiphathi eyenkohlakalo nemali ehlala ikhwatshaniswa yi-ANC? Kumanje sesaba ukuyogoma ngenxa yokungayithembi le ANC othi asoyivotela. Ngabe mfo kaMsweli wena ubona konke kuhamba kahle ezweni selokhu kwaphatha i-ANC?
Elami lithi asingafunzwa into esiyibonayo ukuthi ayilungile, kuhle sizikhethele iqembu esibona lizosenzela umehluko. Sebeqalile kumanje, bagcwele izinkalo bahlinzeka imiphakathi ngentuthuko ngoba sebefuna ivoti lethu. Sophinde sibabone eminyakeni emihlanu ezayo.
Baholi bethu, musani ukusenza opopayi size sibone. Kambe nithe kuzoya ogomile ezinkundleni zemidlalo? Ngabe kuzoya ogomile kovota? Nongalo yekela ukudlala ngamehlo ethu ulokhu usifunza imbudane nge-ANC, siyalazi iqembu esizolivotela nelaphatha kahle KwaZulu-Natal.
Kwakungekho ukwebiwa kwemali nokukhwabanisa. Baphi nje oNkk Zandile Gumede noDkt Zweli Mkhize? Yiningi imali ethathwa kithina bakhokhi bentela, lokho kuchaza ukuthi kumele ngabe sinezinto eziningi eNingizimu Afrika. Kepha iqembu elibusayo, liyayidla nobhululu balo.
Thanda Mnikaziwempuphu Chonco
KWESAKWAMTHETHWA